Në rubrikën “Bima dhe Shëndeti” në emisionin e mëngjesit “Rreze Dielli” në Report Tv me specialistin e bimëve mjekësore Ylli Merja folëm për shëndetin mendor. Si të kemi një tru të shëndetshëm dhe kujtesë të fortë.
“Parandalimi i sëmundjeve të sistemit nervor është çelësi i gjithçkaje”, shprehet Ylli Merja.
Po si të kemi një tru të shëndetshëm? Së pari duhet të kuptojmë cilët janë faktorët që ndikojnë në çrregullimin e shëndetit mendor. Sipas Ylli Merja disa nga faktorët janë: çrregullimi i qarkullimit të gjakut; çrregullimet në tretje dhe ato hormonale; trashëgimia familjare; parazitët në organizëm ose probleme me florën bakteriale; problemet me çervikalen, një posturë jo e duhur sjell shqetësime pasi nuk furnizon trurin me gjak; mungesa e mikroelementeve vitaminë B3, B6, W3 W6, acide yndyrore-omega 3.
Disa nga simptomat paralajmëruese të çrregullimit nervor janë:
· Çrregullimet në gjumë, rrudhat në ballë
· Ndjesi si mpirje trupi dhe këputje trupore
· Luhatje tensioni, skuqje sysh, fytyre
· Kostipacion ose diarre
· Dhimbje pas koke deri tek sytë
· Fytyrë e zbehtë
· Shfaqje fizike, ndryshim i tonit të zërit
· Rënie në peshë, ndryshim i humorit
· Fiksim pas një realizimi të pamundur
· Ndjesi sikur dëgjon zëra, mendime negative
Për herë të parë në studion e “Rreze Dielli”, Ylli Merja prezanton një bimë e cila zë një vend të veçantë në tempullin e bimëve.
“Natyra ofron atë që produkti farmaceutik nuk mund ta përmbledhë në një tabletë. Fuqia e natyrës është e gjithanshme! Unë kam zbuluar një bimë që quhet hipofae, e cila është me të vërtetë shumë e nevojshme për sistemin nervor, frenon aq shumë plakjen e sistemit nervor. Nëse këtë bimë e shtypim ashtu siç shtrydhen ullinjtë jep një si vaj të kuq. Kjo bimë ka Koenzimën Q10, e cila është mjaft e shëndetshme për zemrën dhe trurin. Pasi sistemi nervor është i lidhur direkt me zemrën dhe sistemin e tretjes. Gjithashtu goxhi berry, aronia dhe boronica e zezë janë bimë me veti të mrekullueshme” thekson Merja.
Trajtimi alternativ për një tru të shëndetshëm përfshin; përdorimin e antioksidantëve te perimet, erëzat pasi largojnë radikalet e lira dhe ushqejnë trurin. Konsumimi i agrumeve dhe i të gjitha frutave me ngjyrë të zezë, përdorimi i çajit të malit, barit të bletës, borzilokut, rozmarina, mëllaga, lule bliri, heleksiriumi – janë bimë që frenojnë sëmundjet nervore. Gjithashtu të mrekullueshme për shëndetin e trurit janë farat e lirit, arra, lajthia, fara e zezë, shega e egër, shafrani, qumështi i bletës, vitaminë B3, vitaminë D dhe magnez.
Në fund të bisedës Merja dha dhe disa këshilla të rëndësishme:
· Nëse keni dhimbje koke pini një gotë ujë ose çaj, jo një qetësues
· Në darkë pini një gotë qumësht ose çaj me lule bliri ose qumësht me borzilok
· Në mëngjes pini një gotë me rozmarinë
· Nëse keni marrë medikamente farmaceutike për një kohë të gjatë bëni detoks të trupit më çajin detoks dhe antioksidantët nga erëzat
· Përdorni qumësht blete 40-50 g
· Përdorni shegë të egër dhe vaj liri, pasi ju qetësojnë dhe ju mprehin trurin
SHËNIM i REDAKSISË: Çdo i sëmurë ka veçoritë e tij, ndaj për raste të sëmundjeve të rënda, duhet gjithnjë këshillimi me mjekët. Ky artikull nuk mund të përdoret për të sugjeruar një kurim për çdo person.
Në rubrikën “Bima dhe Shëndeti” në studion e Rreze Dielli, specialisti i bimëve mjekësore Ylli Merja ndër të tjera u ndal dhe tek dhimbja e kokës. Sipas tij është i gabuar kalimi direkt në përdorimin e qetësuesve.
“Ka shumë njerëz që u dhemb koka dhe marrin një ilaç qetësues, por unë do të thoja se truri në përbërjen e tij ka ujë, por ka dhe një lëndë toksike e cila shërben për të transmetuar menjëherë informacionin në fraksionin e sekondës, si psh veshi dëgjon një informacion dhe vendos në gadishmëri menjëherë tërë trupin. Nëse lagështira në tru nuk arrin përqindjen e duhur por fillon të shterojë siç shterojnë mikroelementet, pakësohet sasia e ujit, atëherë nis dhimbja e kokës. Pirja e një medikamenti në këtë rast është e gabuar, më mirë duroje pak atë dhimbje koke dhe mos e helmo trurin” shprehet Merja.
Për të larguar dhimbjen e kokës pini shumë ujë, pini një çaj me dafine, një çaj me borzilok apo bar blete. Me pirjen e ujit ne rrisim lagështirën në tru dhe lënda toksike nuk qëndron më në përqindje të lartë dhe dhimbja e kokës fillon të qetësohet. Gjithashtu masazhoni pak kokën për të përmirësuar qarkullimin e gjakut.
