Këshilli i Emërimeve në Drejtësi miratoi sot raportin dhe listën përfundimtare të renditjes së kandidatëve që aplikuan për plotësimin e vendit vakant të krijuar në Gjykatën Kushtetuese, të shpallur nga Gjykata e Lartë për të zëvendësuar Holta Zaçajn.
‘Këshilli i Emërimeve në Drejtësi (KED), me pjesëmarrjen e anëtarëve të tij si dhe të përfaqësuesve të ftuar në përputhje me pikën 2 të nenit 233 të Ligjit nr. 115/2016, zhvilloi të martën, më datë 23.09.2025, mbledhjen e radhës, në bazë të rendit të ditës të publikuar në njoftimin zyrtar të datës 22.09.2025.
Këshilli miratoi Raportin dhe listën përfundimtare të renditjes së kandidatëve që aplikuan për plotësimin e vendit vakant të krijuar në Gjykatën Kushtetuese, të shpallur nga Gjykata e Lartë në datë 11.12.2024. Pas kësaj faze, KED përmbush detyrimin ligjor për të përcjellë këto akte pranë organit të emërtesës dhe bërjen e tyre publike’, thuhet në njoftim.
Mandati i Holta Zaçaj shkaktoi përplasje publike mes asaj personalisht dhe Gjykatës së Lartë. Zaçaj nguli këmbë se do të ikte në fund të vitit 2025, ndërsa Gjykata e Lartë, kërkoi që të largohej në mars të këtij viti.
Pavarësisht se vetë Gjykata Kushtetuese i dha të drejtë Gjykatës së Lartë dhe jo kryetares së saj, Zaçaj, zgjatja e procedurave për zëvendësimin e saj, në fakt e sposton ikjen e saj nga karrigia.
Kliko këtu për të lexuar dokumentin e plotë
Komente
