TIRANË- Partia më e madhe e opozitës, PD, nuk është dakord që për zgjedhjet parlamentare të vitit 2025 të bëhet votim dhe numërim elektronik.
Ajo ju përgjigj negativisht një propozimi të Komisioni Qendror i Zgjedhjeve që ofronte qarqet, Elbasan dhe Durrës.
“Në kushtet kur ende nuk është bërë një transparencë e plotë lidhur me problematikat që cilat kanë karakterizuar këtë proces në dy zgjedhjet pararendëse, në mungesë të mekanizmave efikase të adresimit të problematikave të konstatuara, si dhe në presionin e një kohe të pamjaftueshme për një implementim efikas të kësaj teknologjie në zgjedhjet e ardhshme, shprehim mosdakordësinë tonë lidhur me propozimin tuaj për implementimin e votimit elektronik në zgjedhjet për Kuvendin të vitit 2025”, thuhet në letrën e PD.
Socialistët u përgjigjën më herët, duke i thënë KQZ-së se prioritet kanë qarkun Tiranë. PS nuk e kundërshton Durrësin dhe Elbasanin, por nëse nuk bëhen dot të treja, Tirana duhet të jetë e vetmja ku duhet të ketë votim e numërim elektronik. Në këtë linjë është shfaqur edhe LZHK e Dashamir Shehit që teknologjia të zbatohet në Tiranë.
Ngelet e paqartë nëse KQZ do të ecë përpara me këtë formë votimi pa dakordësinë e pjesës më të madhe të opozitës, por brenda këtij institucioni preferohet shtrirja në Tiranë, ku dalin 38 deputetë.
Testimi i votimit dhe numërimit elektronik në 2021 dhe 2023, në 3 bashki dhe në një njësi në Tiranë, na ka kushtuar rreth 5 milionë euro.
Letra e plotë e PD
Në përgjigje të shkresës tuaj me nr. 2948 prot. datë 11.10.2024 me anë të së cilës ju kërkoni mendim mbi mundësinë e shtrirjes së projektit të votimit elektronik në zgjedhjet për Kuvendin e Shqipërisë të vitit 2025, ju bëjmë me dije se:
Procesi i votimit dhe numërimit elektronik është propozuar nga Partia Demokratike dhe opozita e sotme në vitin 2012, ku pavarësisht konsensusit politik në Komisionin e Reformës Zgjedhore dhe parashikimit ligjor të mëpasshëm, për t'a pilotuar këtë projekt në zgjedhjet e vitit 2013, kjo përpjekje u pamundësua nga opozita e asaj kohe Partia Socialiste e Shqipërisë, sot mazhorancë qeverisëse.
Platforma e Opozitës për Çlirimin e Zgjedhjeve, e vitit 2016, e vendosi përsëri si prioritet procesin e votimit dhe numërimit elektronik, duke e konsideruar atë si një nga shtyllat kryesore të platformës dhe si një hap cilësor drejt qëllimit të organizimit të zgjedhjeve me standarte ndërkombëtare.
Ky vizion dhe këmbëngulje e Partisë Demokratike, solli në implementimin e pjesshëm të këtij projekti në zgjedhjet për Kuvendin të vitit 2021 në njësinë administrative nr. 10, Bashkia Tiranë dhe në bashkitë Elbasan dhe Kamëz në zgjedhjet e datës 14 maj 2023.
Pavarësisht kësaj, implementimi i pjesshëm i këtij projekti, krahas disa avantazheve dhe suksesit të pjesshëm solli edhe një seri problematikash të cilat jo vetëm e cënuan rëndë procesin, por edhe minuan në mënyrë serioze besimin e publikut dhe të forcave politike në të.
Pamjet filmike të operatorëve të sistemit, të cilët përkundër kujdesit për mbarëvajtjen teknike të makinerive të votimit elektronik shkelën ligjin për të mbivendosur interesin partiak, duke votuar vetë në emër dhe për llogari të zgjedhësve të cilët nuk ishin aty ndërkohë që kjo përbën shkelje të Kodit Zgjedhor dhe vepër penale, dëshmojnë veprime që u konsuamuan në prezencë të komisioneve të qendrave të votimit dhe ende sot mbeten të pahetuara si nga ana juaj ashtu edhe nga ana e organeve të drejtësisë të cilët duhet të vigjëlojnë mbi procesin zgjedhor.
Mungesa në zbatim e garancive që ligji u jep zgjedhësve për të verifikuar votën dhe anuluar atë, mungesa e mekanizmave që garantojnë verifikim të thelluar dhe transparencë, gjithashtu minuan besimin e zgjedhësve, subjekteve zgjedhore dhe publikut në një proces që kërkon besim.
Përsa më sipër, në kushtet kur
1-ende nuk është bërë një transparencë e plotë lidhur me problematikat që cilat kanë karakterizuar këtë proces në dy zgjedhjet pararendëse,në mungesë të mekanizmave efikase të adresimit të problematikave të konstatuara,
2-si dhe në presionin e një kohe të pamjaftueshme për një implementim efikas të kësaj teknologjie në zgjedhjet e ardhshme,
3-shprehim mosdakordësinë tonë lidhur me propozimin tuaj për implementimin e votimit elektronik në zgjedhjet për Kuvendin të vitit 2025.
(Kliko këtu për të lexuar dokumentin e plotë)
Lajm ne përditësim....
Kreu i Demokratëve Euroatlantikë, Lulzim Basha, ka reaguar ndaj vendimit për të hequr votimin dhe numërimin elektronik, duke e quajtur atë një akt poshtërues ndaj betejës së demokratëve.
Basha thekson se pazarët e fshehta për sabotimin e Komisionit të Reformës Zgjedhore tregojnë se dyshja po mbron pushtetin e njëri-tjetrit dhe se të dyja palët kanë humbur çdo legjitimitet moral e politik. Ai bën thirrje për ndëshkimin e tyre përmes votës, duke theksuar se Shqipëria meriton një alternativë më të mirë.
‘Të flakësh në plehra betejën disavjeçare të demokratëve për votim dhe numërim elektronik, është një akt poshtërues, që dëshmon edhe njëherë se Berisha dhe grupimi i tij u shërbejnë vetëm interesave të tyre të vogla dhe meskine.
Pasi bashkoi votat me Ramën për amnistimin e turpshme të të korruptuarve, pasi bashkoi votat me Ramën për mbylljen e listave, pas pazarit për vulën, Berisha ka humbur çdo legjitimim moral dhe politik, duke u shfaqur si paterica e Ramës, me të cilin ndanë të njëjtin fat.
Frika e tyre përballë qytetarëve, që e kanë kuptuar pazarin e pistë me sabotimin e Komisionit të Reformës Zgjedhore, del sërish në sipërfaqe me pengimin e votimit elektronik, përmes të cilit duan të mbrojnë pushtetin e Ramës dhe teatër-opozitën e Berishës.
Të dy nuk kanë më çfarë t’i japin Shqipërisë, të dy duhen ndëshkuar me votë, pasi të votosh Ramën do të thotë të mbash si pseudo opozitë Berishën, të votosh Berishën do të thotë të mbash në pushtet Ramën.
Shqipëria meriton më shumë!’, shkruan Basha në Facebook.
Komente
Nuk ju dalin llogarite ne asnje lloje forme, vet e kishin kerkuar tani e kundershtojne. Hajde merre vesh sektin!
Përgjigju