Ndonëse është i pari që ka kristalizuar listën e kandidatëve për zgjedhjet e 14 majit, Sali Berisha, që ende kërkon vulën e partisë në dyert e gjykatës, njëjtë si më 6 mars, nuk do të ketë as në këto zgjedhje, anëtar në Komisionet e Administrimit të Zonave Zgjedhore.
KQZ ndau këtë të hënë anëtarët e KZAZ-ve që do të propozohen sipas rezultateve që morën në zgjedhjet e fundit partitë: 2 PS, 2 PD, 1 PSD e Tom Doshit dhe 1 anëtar nga Partia e Lirisë. Anëtari I Shtatë, zgjidhet me short mes PD e PS.
Në këto kushte, sfida e PD së Alibeajt që do të përfaqësojë logon e PD në këto zgjedhje, nëse gjykata nuk vendos para marsit për fatin e selisë blu, është gjetja e anëtarëve të tyre për KZAZ, deri në fund të janarit.
Ndërsa Berisha mbetet të zyrtarizojë koalicionin me Partinë e Ilir Metës, që të ndajnë mes tyre jo vetëm anëtarët e KZAZ-ve, komisionerët, numëruesit e vëzhguesit, por edhe të drejtën ligjore për të regjistruar kandidatët për kryebashkiakë.
Gjatë mbledhjes së sotme KQZ ka bërë me dije se pas verifikimeve të thelluara rezulton se kandidati për deputet në zgjedhjet e 25 Prillit për Partinë Demokratike, Agron Kapllanaj, nuk ka asnjë pengesë për të ushtruar funksionin publik të deputetit. Ky vendim i marrë nga KQZ gjithashtu hedh poshtë akuzat e bëra nga Partia Demokratike e Sali Berishës kundrejt Kapllanajt, të cilët më herët u shprehën se ai nuk mund të kandidojë për kreun e Bashkisë së Mallakastrës për shkak të problemeve me ligjin në shtetin fqinj, Itali.
Kapllanaj është kandidati zyrtar i Partisë Demokratike të udhëhequr nga Enkelejd Alibeaj për Bashkinë e Mallakastrës.
“Në seancën e sotme publike të datës 09.01.2023: – Pas shqyrtimit të verifikimit të thelluar të Prokurorit të Përgjithshëm për subjektin vetëdeklarues z. Agron Faslli Kapllanaj, kandidat për deputet i propozuar nga Koalicioni “Partia Demokratike – Aleanca për Ndryshim PD-AN”, qarku Fier” dhe për subjektin vetëdeklarues z. Kleo Hekuran Murataj, kandidat për deputet i propozuar nga Partia Social Demokrate e Shqipërisë, qarku Tiranë”, u konstatua se z. Agron Kapllanaj dhe z. Kleo Murataj nuk përfshihen në kushtet e ndalimit për të ushtruar funksionin publik të deputetit.
– U plotësuan vakancat në këshillin bashkiak të Bashkisë Përmet dhe Bashkisë Dibër,
– U vendos regjstrimi i nismës ligjvënëse të zgjedhësve “Për përcaktimin e minimumit jetik”, thuhet në vendim.
Kujtojmë se në vitin 2004 ai u dënua me 2 vite burg dhe 300 euro gjobë gjykatë në Firence pasi akuzohej për vjedhje.
Komente
Do te ishte me demokratike sikur anetari i 7-te te zgjidhej me short mes partive te vogla,nese keto nuk kane njeri,atehere mund te pretendohej nga dy partite me te medha.PD dhe PS nuk u mjafton pjesa e luanit por duan dhe kockat!
Përgjigju