Federata shqiptare e boksit, pas padisë së bërë nga ‘Shoqata e boksit Elbasan’ në prokurori për zgjedhjet, ka vënë në dispozicion të Report TV vendimin e gjykatës mbi këtë çështje. Federata e boksit pretendon se gjykata ka rrëzuar kërkesën për pezullimin e zgjedhjeve të bërë nga shoqata e Elbasanit dhe se zgjedhjet janë të rregullta.
Shoqata e boksit të Elbasanit bëri kallëzimin në prokurori pasi pretendon se federata organizoi zgjedhjet pa dijeninë e saj dhe disa shoqatave të tjera, ndërsa gjithashtu thotë se komiteti ekzekutiv e ka përjashtuar pa të drejtë.
Lidhur me vendimin e fundit të gjykatës, Report TV kontaktoi sërish me Shoqatën e boksit të Elbasanit, që pretendon se vendimi i gjyaktës është mbi masën e sigurisë dhe se ende nuk ka një vendim për këtë çështje. Shoqata e boksit të Elbasanit beson se zgjedhjet e 22 shkurtit, ku iu besua një tjetër mandat presidentit Florend Kalivopulli, do të zhbëhen në gjykatë.
Shoqata e boksit të Elbasanit, por edhe disa shoqata të tjera pretendojnë një sërë shkeljesh për zgjedhjet. Ata thonë se asambleja është mbledhur me firmën e një presidenti të cilit i kishte përfunduar mandati dhe se zgjedhjet janë bërë shumë më herët se ç’e lejon statuti në raport me vendimin e gjykatës që rrëzoi masën e sigurisë.
Këto shoqata pretendojnë gjithashtu se zgjedhjet janë manipuluar deri në atë pikë, sa të krijohen shoqata false si ajo e Dinamos që nuk ka asnjë sportist, ndërsa janë përjashtuar të tjera që ekzistojnë prej kohësh. Siç është edhe rasti i shoqatës Rozafa në Shkodër.
Komente
