Kosova mban sot zgjedhjet parlamentare, një test kyç për qeverinë e Albin Kurtit, i cili kërkon një tjetër mandat mes sfidave të brendshme dhe raportit shpesh të tensionuar me faktorin ndërkombëtar.
Eksperti i marrëdhënieve ndërkombëtare, Geron Kamberi, në një intervistë për Report TV, theksoi se Kurti ka qenë i qartë në vizionin e tij politik që para se të vinte në pushtet, veçanërisht në raport me shtrirjen e autoritetit të Kosovës në veri dhe refuzimin e Asociacionit të Komunave me shumicë serbe.
“Duhet të kemi parasysh që Kurti, që në emërtimin e partisë e ka bërë të qartë që s’ka ardhur në politikë për të thënë po, por emri Vetëvendosje nënkupton që në disa aspekte që lidhen me Kosovën, disa gjëra duhet t’i vendosin vetë autoritetet e Kosovës në atë që e gjykojnë në interes të Kosovës. Kjo s’do të thotë që në çdo gjë tu kundërvihet partnerëve. Nuk e ka bërë, por në disa raste si ajo që lidhet me shtirjen e autoritetit të Kosovës në veri, sa i përket idesë së krijimit të asociacionit së komunave serbe, ai ka qenë i qartë edhe para se të vinte në qeveri”, shprehet Kamberi.
Në një intervistë me gazetarin Andi Kapxhiu, Kamberi thotë se në fushatën elektorale, Kurti ka vënë theksin tek shtrirja e autoritetit të qeverisë në të gjithë territorin e Kosovës, një mesazh që sintetizohet edhe në sloganin e tij “Cep më cep”. Por, sfida e tij kryesore mbetet balancimi mes një politike të brendshme më sovraniste dhe nevojës për të ruajtur aleancat strategjike me Perëndimin.
“Në varësi të rezultateve që ka arritur dhe një këmbëngulje shpesh të pazakontë kundrejt traditës që ka pasur politika e Kosovës kundrejt faktorit ndërkombëtar, pret të marrë një mandat tjetër nga populli i Kosovës. Përgjatë fushatës elektorale ia i ka mëshuar shumë faktit që qeveria e tij dhe ia në mënyrë të posaçme ka bërë të mundur të shtrijë autoritetin e qeverisë në gjithë territorin. Dhe slogani cep më cep e tregon atë. Do jetë populli i Kosovës që do të vendosë nëse do i japë atij edhe një mundësi tjetër”, vijon Kamberi.
Kamberi thekson se mbështetja e faktorit ndërkombëtar ka qenë jetike për zhvillimin e Kosovës dhe se çdo qeveri në Prishtinë duhet të ketë parasysh këtë realitet.
“Kosova ka këtë status dhe zhvillim për shkak të kontributit të jashtëzakoshëm të faktorit ndërkombëtar, veçanërisht SHBA. Ai i ka besuar deri në fund dhe vazhdon të besojë që këtë qasje populli e Kosovës e shpërblen e ka shpërblyer duke i dhënë një mandat të qartë në 2021 dhe pret që këtë qasje ta rifitojë sërish. Jo duke pasur parasysh vetëm shtrirjen e autoritetit në veri, por edhe rindërtimi i një partneriteti me Serbinë. Kurti ka theksuar se Kosova në tryezën e bisedimeve nuk duhet ë shkojë me komplekse, por duhet të jetë Serbia”, shprehet Kamberi.
Komente
