Fletët e votimit për 246 mijë votuesit nga diaspora, janë duke u prodhuar aktualisht në Slloveni. Pritet që ato të transportohen me kamionë dhe të jenë në Shqipëri brenda 5 ditësh.
Sapo të jenë në Tiranë, fletët dhe zarfet zgjedhorë do të vendosen në Parkun Olimpik të Tiranës, aty ku KQZ do të bëjë mbushjen e pakove sipas shteteve dhe duke i vendosur çdo votuesi fletën e votimit të qarkut të tij.
Shpërndarja e zarfeve do të bëhet përmes postës së shpejtë, nga kompania që firmosi kontratë më KQZ.
“Ka filluar procesi i printimit të fletëve të votimit për votimin jashtë vendit dhe besojmë që midis datave 7-8 Prill do të kemi këtu fletët e votimit. Midis 8-9-10 fillojmë përgatitjen e zarfave dhe dokumentacionin që do t’u dërgohet votuesve, duke shpresuar që ky process të realizohet brenda datës 15-17 Prill. Kohë e mjaftueshme sipas parashikimeve kontraktuale që do të kemi me operatorin e shërbimit postar për të dërguar zarfat, për t’i dhënë kohë rreth 3-4 ditë për të plotësuar fletën e votimit dhe koha për t’u kthyer në KQZ deri në 19:00 të datës 11 Maj. Jemi duke përfunduar një tutorial për gjithë sa duhet të bëjë votuesi nga jashtë dhe me brenda 2-3 ditëve do të bëhet publike nëpërmjet mediave por edhe rrjeteve sociale. Po ndërtojmë një system të ndihmës dhe këshillimit për votuesit nga jashtë nëse kanë nevojë për sqarime për procedurat e votimit. Në setin e dokumentacionit, që do t’u dërgojmë do të jetrë edhe një udhëzues që sqaron qartësisht se çfarë duhet të bëjë votuesi nga jashtë.”, u shpreh Celibashi.
Për ata emigrantë që nuk do të gjenden në adresë, postieri do të lërë një shënim për ditët tjetër kur do të vijë, ose mundësinë ku votuesi mund të shkojë ta tërheqë vetë zarfin.
“Sa i përket votimit brenda vendit, ajo që vlerësojmë më të rëndësishme për momentin është me fillimin e procesit të rekrutimit të operatorëve të përdorimit të pajisjes së votimit elektronik. Ky proces ka filluar prej disa ditësh, janë 6500 aplikime për operatorë por 5200 qendra votimit. Numri përfundimtar i qendrave të votimit do të dalë pasi drejtoria e përgjithshme e gjendes civile të përcjellë në KQZ ekstraktin e fundit të listës së votuesve brenda vendit. Kemi përgatitur një program të trajtimit të trajnimit të operatorëve. Ndërkohë jemi në procesin e përgatitjes teknike të këtyre pajisjeve. Kemi filluar edhe procesin e përgatitjes së votimit elektronik për njësinë nr 10 dhe bashkinë e Vorës. Besoj për 10 ditë, ose dy javë, do të vendosim në disa pika të njësisë 10 dhe bashkisë Tiranë, ku do të instalojmë këtë pajisje që votuesit të familjarizohen me përdorimin e këtyre pajisjeve”, u shpreh Celibashi.
KQZ zotohet që së shpejti të publikojë video orientuese, për të ndihmuar votuesit të plotësojnë saktë fletën e votimit dhe njëherësh të mos bëjnë asnjë shënim mbi zarfet ku do ta fusin fletën. Diasporës i sugjerohet që të votojë brenda 3 ditësh nga marrja e zarfit dhe ta postojë për në KQZ, pasi çdo zarf që vjen pas orës 19 të datës 11 maj, nuk do të numërohet.
Komente
