Deputeti i mazhorancës, Arben Pëllumbi, tha sot në Report Tv gjatë debatit politik për zgjedhjet e 11 majit me të ftuarit në ‘5 Pyetjet nga Babaramo’ se PS ishte në favor të numërimit elektronik në disa qarqe në vend dhe të Diasporës.
Por për shkak të refuzimit nga ana e PD-së kjo nuk u arrit, sepse duhej edhe konsensusi në vota e ndryshime të Kodit.
Ai shpjegoi edhe se çfarë kishte ndodhur gjatë diskutimeve dypalëshe.
“Kërkohej ndryshim në Kod për kthimin e votës, se merrej përsipër vetëm për vajtjen. Pra kërkohej edhe PD për këtë marrëveshje. Ne donim që vota të numërohej elektronikisht, kurse këta (PD) nuk e deshën, propozuan që numërimi elektronikisht i votës së diasporës të mos bëhej, por të numëroheshin manualisht. Për më tepër që kërkonte logjistikë shtesë, pajisje, linjë interneti dhe për këto nuk u ra dakord nga pala tjetër, nuk u gjet konsensusi politik për këtë çështje, pasi ndryshimet në Kod bëhen bashkarisht”, shpjegoi ai.
Kreu i Lëvizjes “Bashkë”, Arlind Qori u shpreh se sigurisht numërimi elektronik apo me kompjuter është më i mirë se ai me dorë.
Por nënvizoi se partia e tij ka ngritur struktura të organizuara për monitorimin e tyre dhe pas 11 majit nuk do dëgjonin asnjë ankesë nga ai apo partia e tij për vjedhje votash.
“Nuk do dëgjoni nga unë dhe lëvizja që drejtoj pas 11 majit ankesa për vjedhjen e votës. Ne kemi ngritur struktura për monitorimin e procesit zgjedhor dhe numërimit. Nuk do ankohemi për vjedhje votash jo sepse nuk do tentojnë t’i vjedhin, por nuk do i lëmë. Për sistemin zgjedhor mendoj se më shumë punë bën SPAK sesa ne si politikë. Nëse SPAK bën punën e tij, duke ndjekur politikën që ble votat, që kërcënon, që devijon apo vjedh votën, t’i ndëshkojë. Vota elektronike është më e mirë, por edhe me stilolaps mund të kontrollohet nëse funksionojnë strukturat. Vota e partive të vogla historikisht është vjedhur nga partitë e mëdha PD-PS, sepse ato nuk kishin njerëz të guximshëm”, u shpreh Qori.
Lajmi kryesor:
Zgjedhjet/ Pëllumbi: Objektivi i PS mandati i katërt, kemi BE në krah! Qori: Nëse zgjidhem deputet, s’do jem kryetar i partisë! Kraja: Mungon demokracia! Jupi: PS-PD janë bashkë, të ikin
A.Q/ReportTv.al
