2 punonjësit e policisë Hajredin Boja dhe Fatmir Isufi janë lënë në qeli nga gjykata e Tiranës sot, të akuzuar se nuk respektuan procedurat për të ndaluarit në Komisariatin e Kamzës, ku si pasojë 26-vjeçari Arben Mici i vuri zjarrin qelisë dhe humbi jetën nga asfiksia.
Ngjarja u regjistrua tre ditë më parë, ndërsa ditën e djeshme u konfirmua se ishte i riu Mici ai që i vuri flakën me çakmak dyshekut të krevatit të qelisë. Si pasojë e pakujdesisë së efektivëve përgjegjës, Mici u la të futej në qeli me çakmak me vete, ndërsa po ashtu u gjetën edhe një paketë duhani me tetë filtra, ndërsa në trup iu gjetën nëpër xhepa pesë cigare dhe një paketë.
Mici, i arrestuar pasi dhunoi të ëmën, ka qenë një person problematik, ndërsa në 5 vite ishte shoqëruar 22 herë në polici. Paraprakisht u dyshua se Mici e thuri planin e zjarrvënies bashkë me të arrestuarin tjetër, Dilaver Idrizin, me qëllimin për t'u arratisur, por një tezë e tillë ka rënë. Vetë Idrizi deklaroi se zjarrin e kishte vënë Mici dhe se ai ishte nxjerrë jashtë qelisë nga polici Hajredin Boja, i cili mbeti i asfiksuar. Familjarët e 26-vjeçarit kanë deklaruar se ai vuante nga probleme të shëndetit mendor.
Nga zjarri në Komisariat u plagos efektivi Hajredin Boja e i arrestuari Dilaver Idrizi, të cilët ndodhen në spital jashtë rrezikut për jetën.
