Alvaro Morata rikthehet në Itali, por këtë herë jo me fanellën bardhezi të Juventusit, por me atë të Milanit. Nuk ka më asnjë mëdyshje pasi kapiteni që udhëhoqi Spanjën drejt triumfit të Kampionatit Evropian 2024, e ka konfirmuar vetë kalimin te "Djalli".
Atyre që e pyesin pse zgjodhi Milanin, Morata u përgjigjet. "E thjeshtë, arsyeja është besimi nga Zlatan, te ekipi, te trajneri. Mezi pres të filloj. Tani po shkoj me pushime sepse dua të jem me familjen time që më ka ndihmuar shumë, përndryshe do të stërvitesha nga nesër”.
Për bisedën e parë me Ibrën, Morata shpjegon se ishin gjëra të bukura.
"Gjëra pozitive. Unë gjithashtu e di që kam vitet më të mira të karrierës time përpara dhe dua të shkoj në një klub të madh si Milani", tha 31-vjeçari, i cili do prezantohet zyrtarisht pasi kontrata të depozitohet në Federatë, me testet mjekësore që u kalua me sukses.
Marrëveshja me sulmuesin spanjoll ështa katër vjeçare me pagë 5 milionë euro në sezon dhe pritet të zgjasë deri në verën e vitit 2028. Transferimi i Moratas do t’i kushtojë kuqezinjve 13 milionë euro, aq sa ishte klauzola e lojtarit te Atletico Madridi.
S.DH/ReportTv.al![](https://www.report-tv.al/template/img/antipiracynote.jpg)