Harry Kane është sulmuesi më i ri i Bayern Munich. Kampionët e Bundesligës kanë bërë blerjen më të shtrenjtë në historinë e klubit, duke paguar 120 milionë euro te Tottenham. Tanimë kapiteni i Anglisë do veshë fanellën me numrin 9, atë që la Lewandowski një vit më parë.
Pas negociatave të gjata, Bayern Munich bindi Tottenhamin për shumën rekord, me sulmuesin që do jetë në "Allianz Arena" deri në verën e 2027. Në prezantim, Kane është shprehur i lumtur.
"Jam shumë i lumtur që jam pjesë e Bayern tani. Bayern është një nga klubet më të mëdha në botë dhe gjithmonë kam thënë se dua të konkurroj dhe të tregoj veten në nivelin më të lartë gjatë karrierës sime. Ky klub përcaktohet nga mentaliteti i tij fitues, ndihem shumë mirë që jam këtu", tha Kane.
30-vjeçari gjatë gjithë karrierës së tij me Tottenham nuk ka fituar asnjë trofe, teksa mund të jetë pjesë e ekipit të Tuchel në finalen e Superkupës së Gjermanisë kundër Leipzig, e cila luhet sot në 20:45.
