Ivan Gvozdenovic do jetë trajneri i Skënderbeut edhe për tre sezonet e ardhshme. 45-vjeçari serb ka bindur drejtuesit në Korçë, që i kanë ofruar rinovimin e kontratës trajnerit.
"Ivan Gvozdenovic edhe 3 vite bardhekuq! Trajneri ka rinovuar kontratën me klubin e Skënderbeut dhe do vijojë të jetë pjesë e jona dhe për një kohë të gjatë. I urojmë suksese trajnerit tonë", njoftojnë korçarët.
I afruar në stolin e bardhekuqve në 26 nëntorin e 2022, Gvozdenovic drejtoi Skënderbeun në Kategorinë e Parë, duke u shpallur kampion dhe ngjitur ekipin në elitën e vendit.
Tanimë në Superligë, në dy ndeshjet e para në drejtimin e tij, Skënderbeu ka marrë dy fitore dhe kryeson renditjen. Klima e mirë në ekip, dëshira dhe pasioni që serbi ka treguar edhe në stol, ka sjellë edhe rinovimin për ish-lojtarin që ka mbajtur veshur fanellën e korçarëve në fushë.
