Eros Grezda është sulmuesi më i ri i Partizanit. Kampionët në fuqi të Shqipërisë kanë zyrtarizuar gjithçka për ish-in e Kombëtares, teksa 'blindojnë' kështu krahët e sulmit për ndeshjet në Champions League dhe Superligën e edicionit që vjen. 28-vjeçari ka gjetur akordin për një vit, me të drejtë rinovimi edhe për një tjetër.
"Partizani njofton arritjen e marrëveshjes me Eros Grezdën. Ish sulmuesi i ekipit tonë kombëtar është zyrtarisht pjesë e kampionëve të Shqipërisë. 28 vjeçari ka nënshkruar një kontratë 1 vjeçare me të kuqtë, me të drejtë rinovimi nga ana e klubit edhe për një tjetër sezon. Përgjatë karrierës së tij Grezda është aktivizuar në radhët e Lokomotiva Zagreb, Osijek, Glasgoë Renxhers, Sibenik, Manisa dhe Zalaegerszeg. Me ekipin tonë përfaqësues sulmuesi 28 vjeçar rregjistron 13 prezenca dhe 1 gol", njofton Partizani.
Të kuqtë vijojnë fazën përgatitore në Pogradec, teksa në mesin e korrikut do luajnë në fazën e parë të Champions League kundër BATE Borisov. Me afrimin e Grezdës, Partizani tregon nivel të lartë në merkato, duke marrë një tjetër ish-lojtar të Shqipërisë. Sulmuesi nga Gjakova do mbahet mend për kalimin e tij te Rangers dhe karrierën në Kroaci. 13 ndeshje me kuqezinjtë ka luajtur Grezda, duke shënuar një gol.
