Erzeni ka zyrtarizuar shkarkimin e trajnerit Xhevahir Kapllani. Tre javë nga fundi i sezonit, shijakasit kanë vendosur të largojnë trajnerin pas 33 raundesh kampionat. Pas mbledhjes së bordit të klubit mbrëmjen e djeshme, Erzeni tanimë do kërkojë mos bjerë nga Superliga me një tjetër emër në stol.
"KF Erzeni njofton se Xhevahir Kapllani nuk do jetë më trajneri i ekipit. Klubi e falënderon për punën e bërë dhe i uron suksese në karrierë", njofton Erzeni.
Kapllani e mori drejtimin e ekipit fillimin e këtij sezoni, teksa bëri një punë të mirë duke e mbajtur skuadrën deri në vendin e katërt, me pretendimin për në Europë.
Javët e fundit Erzeni nuk diti të dilte te loja e tij, teksa shijakasit nuk fitojnë prej tetë ndeshjesh në Superligë. Një gjë e tillë ka sjellë edhe shkarkimin e trajnerit.
Në 33 javë që drejtoi Erzenin në elitën e Shqipërisë, Kapllani numëron tetë fitore, 15 barazime dhe 10 humbje. Në vendin e tetë tre javë nga fundi i sezonit, shijakasit rrezikojnë qëndrimin në Superligë duke qenë për momentin në zonën play-out.
