Masanga Matondo është zyrtarisht lojtari i Hatayspor në Superligën turke të futbollit. Partizani dhe turqit kanë gjetur akordin mbi bazën e 600 mijë eurove, teksa 24-vjeçari është prezantuar në klubin e ri. Veç shumës së majme, kampionët e Shqipërisë ia kanë dalë të mbajnë edhe 20 përqind të kartonit të mesfushorit, në rast të një tjetër shitje të tij.
Kongolezi u bashkua me "Demat" në janarin e 2022, për të qenë pika kyçe e mesit të fushës sezonin e shkuar, aty ku të kuqtë ia dolën të ngrinin trofeun e kampionit. Me vlerë 500 mijë euro në treg, Matondo u afrua falas te Partizani dhe për këtë të kuqtë kanë bërë "bingo" me shitjen e tij.
Veç të ardhurave nga pjesëmarrja në Europë, aty ku Partizani luan të enjte në play-off e Conference League me Astanën, tanimë të kuqtë marrin të tjera të ardhura edhe nga shitja e një prej lojtarëve më të mirë të ekipit.
Komente
