Borussia Dortmund njoftoi të martën zgjatjen e kontratës me trajnerin Niko Kovac (53 vjeç). Fillimisht i lidhur deri në vitin 2026, klubi gjerman dhe kroati janë zotuar për një aventurë të përbashkët deri më 30 qershor 2027.
Kovac u bashkua me Dortmundin në shkurtin e këtij viti dhe e mori ekipin në vendin e 11-të pas javës së 20-të, duke ia dalë që të mbyllte sezonin në pozitën e katërt për një vend në Champions League.
Kjo arritje bëri që drejtuesit t'i besonin edhe për një vit tjetër, trajnerit që më herët ka qenë në stolat e kombëtares kroate, Eintracht Frankfurt, Bayern Munich, Monaco dhe Wolfsburg.
Drejtori Sportiv i Dortmund, Sebastian Kehl, theksoi se janë të gëzuar që kanë një marrëveshje të re me Kovac dhe ndihmësit e tij.
"Jemi shumë të lumtur për zgjatjen e kontratës për Nikon dhe ekipin e tij të trajnerëve. Kjo qartësi është e rëndësishme që të gjithë të përqendrohen plotësisht në sezonin dhe sfidat që na presin. Ne përpiqemi për sukses maksimal dhe duam t'i qasemi çdo ndeshjeje me bindje, intensitet dhe pasion. Niko dhe ekipi i tij i kërkojnë këto vlera çdo ditë dhe ne besojmë se së bashku do të vazhdojmë rrugën e suksesshme të vrullit të fundit të sezonit të kaluar", tha ai.
Komente
