Foto: Richard Grenell dhe Hashim Thaçi
Richard Grenell, i dërguar për misione të veçantë i presidentit amerikan Donald Trump, e ka uruar Kosovën për 17 vjetorin e Pavarësisë.
Përmes një postimi të publikuar në X Grenell shprehet se presidenti Hashim Thaçi, duhet të festojë sot në Prishtinë - jo pas hekurave në Hagë. Grenell ka theksuar gjithashtu se ky moment historik është lënë në hije nga një padrejtësi e rëndë.
“I uroj të gjithë miqve të mi në Kosovë një festë të gëzueshme dhe të sigurt në 17 vjetorin e pavarësisë së tyre. Megjithatë, ky moment historik është lënë në hije nga një padrejtësi e rëndë. Babai themelues i shtetësisë së Kosovës, presidenti Hashim Thaçi, duhet të festojë sot në Prishtinë - jo pas hekurave në Hagë", shkroi Grenell në X.
Më tej ai nënvizon se ky burgim duhet të marrë fund teksa ka vendosur me hashtag emrin e ish-kryeprokurorit të Hagës, Jack Smith.
"Evropianët nuk kanë arritur të veprojnë kundër kësaj padrejtësie në 5 vitet e fundit. Dhe institucionet shtetërore të Kosovës kanë dështuar të ndërmarrin veprimet e nevojshme ligjore për t'i dhënë fund kësaj padrejtësie - për shkak të politikës. Ky burgim i padrejtë duhet të marrë fund, #JackSmith", përfundon shkrimi i Grenell.
Lajmi kryesor:
17-vjetori i pavarësisë së Kosovës e gjen Thaçin në Hagë, Rama e Grenell në një zë: Europianët e institucionet e Prishtinës dështuan t'i japin fund padrejtësisë së madhe
Xh.K/ReportTv.al
