Situata politike, zgjedhjet e 11 Majit, koalicionet, beteja e SPAK me krimin dhe sulmet ndaj tij, ishin disa nga temat e trajtuara në ‘Studio Live” ditën e sotme, ku i ftuar për një analizë-intervistë ishte kryetari i Partisë Agrare Ambientaliste, Agron Duka.
Teksa është pyetur nga moderatori Arbër Hitaj për strategjinë elektorale dhe koalicionin opozitar, deputeti opozitar u shpreh për Report Tv se PAA do e ketë një deputet të sigurt në listat e mbyllura të PD, sipas marrëveshjes së bërë mes partive.
Politikani theksoi se largimi i fraksioneve nga PD e dëmton atë në zgjedhjet e 11 Majit dhe se bashkimi do të ishte pozitiv, pasi do rriste shanset për një rotacion pushteti.
Duka tha edhe se nëse fitojnë, nuk do ia japë votat Berishës për nismën e tij për shkrirjen e SPAK, duke u shprehur kundër idesë, teksa kërkoi që SPAK të shkëpusë e godasë lidhjet e krimit me politikën.
“Nuk jam për shkrirjen e SPAK, nuk do ia jap votën. Berisha nuk besoj se i kërkon apo do e dëgjojë mendimin tim, por jo, nuk jam për shkrirjen e SPAK”, u shpreh ai.
Në lidhje me krimet zgjedhore, këmbënguli se më mirë do ishte të goditej dhe shkëputej lidhja e krimit të organizuar me politikën, pasi krimi ndërhyn në zgjedhje.
Duka theksoi se ishte gjysmë dakord me Ramën për deklaratën e sotme, pasi nuk kishte nevojë për një survejim të thelluar të partive dhe mbështetësve të tyre, por Prokuroria thjesht të përqëndrohej tek segmenti krimi i organizuar-politikë.
“Jam gjysmë dakord me Ramën, ato mirë bëjnë se ka dhe krim zgjedhor në Shqipëri. A trembet Rama apo ka diçka tjetër nuk e di. Është evidente, këpusni lidhjet e krimit me politikën, i keni në dosje, po u bë kjo është bërë e gjitha. Por dosja 339 e krimit zgjedhor u harrua. Në Shkodër dihet se ku janë lidhjet e krimit me politikën dhe kështu në qytete të tjera. SPAK të mos merret me gjëra ordinere, të zakonshme. Në zgjedhje, ka përfshirje të krimit të organizuar. Të punohet të shkëpusin krimin nga politika”, tha kreu i PAA.
Ai kritikoi diskursin e kryeministrit Rama ndaj drejtësisë dhe opozitës, me etiketime dhe fjalë fyese:
“Mënyra e komunikimit të Ramës kohët e fundit nuk është i duhuri, me zhaba, zhapiq, gjarprinj, bufa, e dëgjojnë të gjithë, për mua është gabim i paparë”.
Ai dha mendim edhe për nismën më të fundit të qeverisë, ngritjen e Bankës së Zhvillimit.
“Banka e Zhvillimit që do hapi qeveria besoj se është lajm pozitiv por duhet shumë kujdes, duhet të shkojë investimi dhe ndihma aty ku duhet se mund të ndodhë me precedentët e mëparshëm, ka pasur dikur një Bankë Agrare”, tha Duka.
Kryetari i Partisë Agrare Ambientaliste, i ftuar sot në ‘Studio Live’ të Report Tv, dha edhe një prononcim në lidhje me dëshminë e të penduarit të drejtësisë në dosjen “Plumbi i Artë”, Nuredin Dumani, i cili rrëfeu mes të tjerash edhe vjedhjen e shtëpisë së dhëndrit të deputetit Agron Duka në Shijak.
“Unë dhe dhëndri im nuk i kam pasur ndonjëherë lekët cash. Unë i kam kompani, me kredi dhe biznese, aktivitet i rregullt, paratë i mbaj në bankë”, tha ai.
Teksa më tej sqaroi edhe dyshimin se kjo mund të jetë një trillim për qëllime që ai nuk i di.
“Dhëndri im është në Angli, me vajzën time dhe dy fëmijët, me familjen dhe jeton atje. Kjo është rrenë, është e sigurt, por nëse është triller, edhe mundet, për ndonjë qëllim. Për të thënë që ja dhëndri i Dukës ka shumë lekë, apo duke thënë se ka sjellë 500 mijë euro në Shijak, s’e di. Nga ka lindur kjo ide s'e di, nuk kam pse i mbaj 500 mijë euro në shtëpi. Nuk kemi lidhje fare me këtë dhe nuk është e vërtetë”, deklaroi Duka për moderatorin Arbër Hitaj.
Nuredin Dumani në seancën e parë të hapur për dosjen ‘Plumbi i Artë’, u ballafaqua sot (20 shkurt) me Gentian Sharrën dhe me avokatin e tij. Në një moment Dumani tregoi se grabiti një banesë në Shijak, që sipas tij ishte e dhëndrit të Agron Dukës, deputetit të opozitës, ku iu tha se kishte mbi 500 mijë euro.
Agron Duka u shpreh sot për Report Tv se do të kenë një deputet të sigurt në listat e mbyllura të PD-së, sipas marrëveshjes së bërë me aleatin në opozitë.
Kreu i Partisë Agrare Ambientaliste sqaroi se Kodi Zgjedhor nuk i favorizon, ndaj edhe i janë bashkuar PD-së dhe do e respektojnë marrëveshjen me ta deri në fund.
Por deputeti ngriti shqetësime për përçarjen e opozitës, sidomos fraksionet që i janë shkëputur PD-së, që nga Lulzim Basha, Agron Shehaj, Enkelejd Alibeaj dhe të tjerë. Kjo përçarje sipas tij, nëse nuk bashkohen, do i dëmtojë më 11 maj dhe është anë negative. Por theksoi se korrupsioni ku është futur qeveria ka krijuar pakënaqësi në masën popullore dhe kjo është ana pozitive.
“Një kandidat i PAA do jetë në listat e mbyllura të PD. Në lidhje me shkëputjen time mund të them se partitë e mëdha duan vendime të mëdha. Një anije si e jona nuk besoj se e ndjen shumë tronditjen me ikjen time nga gara për deputet, madje rinovohet edhe partia me gjak të ri. Ju e keni parasysh se çfarë ndodhi me zotin Sali Berisha me largimin e tij nga PD, tërheqja e tij më 2013 ka qenë pak a shumë në moshën time, gabim i Bashës që e largoi nga partia, por ai është rikthyer dhe nuk ka njeri tjetër që e bën më mirë këtë punë. Pra largimi i Berishës nga largimi i PD e tronditi partinë, kurse te ne, jemi parti të vogla. Basha bëri taktika negative me lëvizjet e tij në opozitë në drejtim të saj”, tha Duka.
Ai e sheh me negativitet të madh përçarjen brenda opozitës dhe veçanërisht te PD.
“Ata që kanë ikur nga PD mund të dëmtojnë opozitën dhe këto janë anët negative. Nëse do ishin bashkë do ishte frymë tjetër, nëse do ishin altruistë. Flas këtu për Bashën, Shehajn, Djathtas 1912 dhe të tjerat që janë larguar nga PD. Ka largime të shumta nga trungu i PD-së dhe kjo solli dëm, është anë negative. Ikja e tyre sjell humbje votash. Pozitive është fakti se njerëz të qeverisë po dalin si të korruptuar nga qeverisja që ka pasur, edhe pse kryeministri Rama po mundohet ta zbusë, sepse ajo i takon. Por në bazë shikoj se ka pakënaqësi të madhe dhe opozita ngacmon nervin”, shpjegoi ai.
Duka shpjegon edhe shkakun pse është bashkuar me PD, teksa kanë siguruar një emër në listat e mbyllura.
“Kodi Zgjedhor nuk na lë hapësira të shumta. Kemi bërë një kontratë me PD-në dhe do i qëndrojmë deri në fund asaj. Me PD u bashkuam prej Kodit, sepse s’na favorizon. Ka një revoltë dhe shpresojmë të kthehet në votë. Rama po luan me intelektin e njerëzve, kur u votua me 74 vota dhe tani pas 12 vitesh pret 100 vota deputetësh, nuk besoj se i merr aq. Do jetë mirë të mos e bëjë asnjë parti vetëm qeverinë. Do timonin vetë, do ta heqi vetë vallen, por nuk është mirë kështu, pasi kur ke aleatë shërben për zbutje të drejtimit”, tha kreu i PAA.
Ai parashikoi se pavarësisht frymës, partitë e vogla nuk mund të shkojnë më shumë se 1-2 deputetë, por votat e tyre të fragmentarizuara dëmtojnë opozitën në tërësi.
“Partitë e reja uroj që mos të marrin vetëm vota, por edhe mandate, se ajo ka rëndësi. Por këto nuk duhen parë 6 muaj para zgjedhjeve, sepse kur vjen dita e votimit, qytetarët shkojnë tek partitë e mëdha. Ndaj ne si parti e vogël nuk favorizohemi dhe na detyroi të bashkohemi me PD. Besoj se ky do jetë fundi i tyre, vështirë që të përkthehen në mandate me kapërcime si 8 mandate, 20, 70 apo më shumë. Shpresoj dhe besoj diku aty te 1 apo dy mandate, pra shpresoj që ato vota që kanë të përkthehen në deputetë”, shprehet Duka.
Komente
