BULQIZE-Një makinë tip 'Benz' me minatorë ka dalë nga rruga duke përfunduar 20 metra në greminë, ndërsa katër personat që po udhëtonin janë plagosur. Aksidenti ka ndodhur në aksin e rrugës dytësore Krastë-Bulqizë pasditen e sotme rreth orës 18:00. Të plagosurit janë tre gra dhe një burrë, që po ktheheshin nga puna në minierë. Report Tv ka siguruar pamjet nga vendi i ngjarjes ku duket makina që ka përfunduar në humnerë, e përmbysur, pasi ka dalë nga rruga.
Dy nga minatorët e plagosur A.S. 45 vjeç dhe D.M. 42 vjeçe ndodhen në gjendje të rënda dhe janë transportuar në Spitalin e Traumës me helikopter dhe ambulancë për mjekim të specializuar, ndërsa dy të tjerat Xh.K. 44 vjeçe dhe V.K. 32 vjeçe janë në spitalin e Bulqizës jashtë rrezikut për jetën. Ndërkohë që drejtuesi i furgonit 'Mercedez Benz', Y.H. pas aksidentit është larguar nga vendi i ngjarjes. Policia ka nisur hetimet për shkaqet, ndërsa nga të dhënat dyshohet se shkak ka qenë shpejtësia.
