TIRANË - Federata Shqiptare e Futbollit mbajti këtë të mërkurë punimet e Asamblesë të Përgjithshme të Zakonshme në "Shtëpinë e Futbollit". Në këtë mbledhje u miratuan pasqyrat financiare për vitin 2024 dhe buxheti për 2026, teksa kreu i FSHF-së, Armand Duka ka shprehur edhe kritikat e tij në drejtim të Ministrisë së Arsimit dhe Sportit. Gjatë punimeve u konfirmua se edhe gjatë sezonit të ri Superliga do zbatojë skemën "Final 4" për shpalljen e fituesit.
Duke përfituar nga prezenca e ministres Ogerta Manastirliu në Asamble, Duka i ka kujtuar se në llogaritë e FSHF-së ende nuk ka kaluar shuma e premtuar nga ministria për turneun Euro U-17 që u zhvillua disa javë më parë në vendin tonë.
"Për Euro 2025 për U-17 që u organizua në Shqipëri, investuam 5.4 milionë euro vetëm në infrastrukturë. U bënë ndryshime të thelluara në stadiumet "Egnatia", "Elbasan Arena", "Niko Dovana" dhe me një fushë në ambientet e Shtëpisë së Futbollit. Rikonstruktuam fushat e "Selman Stërmasi", "Skënder Halili", "Roza Haxhiu", "Tofik Jashari" dhe "Luzi i Vogël"; të domosdoshme për stërvitjen e ekipeve pjesëmarrëse dhe që do t'i mbeten futbollit shqiptar.
Në fakt, kur kandiduam për të qenë mikpritës të këtij turneu kishim një premtim nga Ministria e Arsimit dhe Sportit për mbështetje financiare, por deri tani nuk ka ndodhur. Urojmë që në ditët në vijim ministria ta përmbushë këtë angazhim të sajin, në të kundërt do na vendoste në pikëpyetje për aktivitetet e ardhshme.
Sot nuk jemi vetëm pjesë e rrjedhës në futbollin evropian, por një zë me peshë, një model pune dhe një partner i denjë në tryezat ku ndërtohet e ardhmja e këtij sporti. Më 11 shtator të këtij viti Komiteti Ekzekutiv i UEFA do mbajë mbledhjen e tij dhe do marrë vendime nga Tirana", tha Duka.
Veç saj, Duka ishte kritik edhe mbi propozimin e "Ndryshimit të Ligjit për Sportin", kjo sa i takon krijimit të një arbitrazhi sportiv, i propozuar nga kreu i KOKSH, Fidel Ylli, që sipas Dukës është një ligj klientelist dhe aspak i pavarur e jo profesional.
"Dje, në Komisionin Parlamentar është propozuar nga Ministria e Arsimit dhe Sportit edhe "Ndryshimi i Ligjit për Sportin", pa mirëkuptimin e asnjë të interesuari për sport dhe me kundërshtimin e argumentuar nga ekspertët tanë. Ai synon të krijojë një arbitrazh sportiv klientelist, aspak të pavarur dhe jo profesional. Në emër të organizatës më të madhe sportive në vend, i bëj thirrje për reflektim Ministrisë së Arsimit dhe Sportit, Komisionit Parlamentar dhe Kuvendit; që mos ta votojë atë ligj, por të bashkëpunojmë të gjithë organizatat sportive dhe grupet e interesit për të prodhuar një paketë ligjore që t'i shërbejë sportit", vijoi kreu i FSHF-së.
Armand Duka foli edhe për kritikat pas rezultateve jo të mira të Kombëtares, duke "shigjetuar" ata që mezi presin humbjen e ekipit për të zbrazur 'mllefet në emër të nacionalizmit dhe patriotizmit'.
"Kam besim të plotë te futbollistët, te stafi teknik dhe administrativ i Federatës, por edhe te publiku që na mbështet pa kursim. Jam thellësisht mirënjohës dhe do jem përjetësisht falenderues për emocionet e paharrueshme që na kanë dhuruar. As ata, as ne nuk duam të quhemi heronj kur fitojmë dhe tradhtarë kur humbasim; sidomos nga ata që i japin të drejtën vetes duke u quajtur patriot. Jemi thjesht një skuadër që jep maksimumin në një lojë me tre rezultate. Kritika është e natyrshme pas një humbjeje, por nuk duhet të bëhet një rast i pritur me padurim për të zbrazur mllefet në emër të nacionalizmit dhe patriotizmit", tha Duka.
Në punimet e sotme të Asamblesë së Përgjithshme të Zakonshme në FSHF është konfirmuar se skema “Final 4” do të vazhdojë të jetë aktive edhe për sezonin e ri.
Sipas përfaqësuesve të FSHF-së, kjo skemë ka sjellë më shumë tifozë në stadium dhe të ardhura për futbollin.
“Do të vazhdojmë me “Final 4” për konsolidimin si një produkt premio dhe si një platformë forcimi dhe komerciale”, theksoi Aldi Topçiu, drejtor në FSHF.
Në këtë mbledhje kanë marrë pjesë të gjithë anëtarët e FSHF-së, të përfaqësuar nga delegatët e tyre. Asnjë kundërshti nuk pati për vijimin e garës me këtë skemë, që në fund vendos katër skuadrat e renditura të parat gjatë sezonit të rregull, në një garë mes tyre në një mini-turne për të shpallur skuadrën kampione.
Komente
