Arrestimi i Jurgis Çyrbjes, në kërkim edhe pronari i ‘Golden’, Altin Hajri! Pas vrasjes së Prengës, ish-deputeti e ndihmoi me ndërhyrje në institucione dhe lëvizjet e policisë

Redaksia

21 Tetor, 08:30| Përditesimi: 21 Tetor, 23:07

DURRËS- Me urdhër të SPAK mbrëmjen e djeshme u arrestua ish-deputeti i PS, Jurgis Çyrbja, i cili akuzohet për lidhje me grupet kriminale. Burime për gazetaren e Report Tv, Keti Banushi bëjnë me dije se GJKKO ka caktuar masë sigurie edhe për Altin Hajrin, pronari i kompleksit Gloden në Shijak, i cili prej katër vitesh rezulton në kërkim si organizatori i rrëmbimit dhe vrasjes së Jan Prengës në janar 2020. Hajri dhe vëllai i tij kanë qenë të hetuar në Itali dhe akuzuar për narkotrafik dhe organizatë kriminale.

Në pranga mbrëmjen e 20 tetorit ra edhe Ahmet Masha, kunati i vëllait të ish-deputetit të PS. Burimet i thanë Report Tv se Çyrbja dyshohet se informuar Altin Hajrin për lëvizjet e policisë pas vrasjes së Jan Prengës. Gjithçka është zbuluar nga komunikimet në platformën e koduar SKY ECC, që ka shërbyer si provë, bashkë me materiale të tjera të siguruara nga prokurorët.

Çyrbja ka qenë deputet i PS gjatë kohës që informonte Hajrin. Rrëmbimi dhe vrasja e Jan Prengës ka ndodhur më 17 janar 2020, kohë kur dyshohet se ish-deputeti socialist e ka strehuar në banesë. Çyrbja është zgjedhur deputet në 2017 në qarkun e Durrësit, kur ishte edhe i treti në listë dhe dorëzoi mandatin më 9 tetor 2024.

Ndërkohë, policia dhe agjentët e BKH nuk ekzekutuan dot masën ndaj Altin Hajrit, pasi nuk u gjet gjatë kontrolleve të djeshme, ndërkohë që ai rezulton në kërkim prej 4 vitesh. Hajrit kështu i shtohet një masë sigurie e re dhe bëhet kështu personi i tretë i dosjes ‘Çyrbja’ dhe SPAK pritet të sqarojë detaje të tjera shtesë për pozicionin e tij në çështje dhe lidhjet me ish-deputetin socialist të qarkut Durrës.

Akuzat ndaj Çyrbjes dhe arrestimi i Mashës

Çyrbja akuzohet për "Korrupsion aktiv zgjedhor", "Përkrahje e autorit të krimit" dhe "Tregtimi i sekretit shtetëror". GJKKO ka caktuar ndaj tij masën e sigurisë arrest me burg, e cila u ekzekutua një ditë më parë, 20 tetor 2024, në qytetin e Durrësit. Kanë qenë bisedat në Sky ECC që kanë fundosur ish-deputetin e PS, por priten ende detaje të reja nga dosja.

Bashkë me të u arrestua mbrëmë edhe Ahmet Masha, një tjetër personazh i njohur për drejtësinë, njëherazi edhe kunati i vëllait të Çyrbjes. Në vitin 2013, Masha është dënuar me 100 mijë lekë të rinj gjobë për naftë kontrabandë në Portin e Durrësit. Ndërkohë, në 2019 Masha është marrë në pyetje nga Policia e Durrësit lidhur me atentatin ndaj Plaurent Dervishajt dhe dy miqve të tij. 43 plumba kallashnikovi u derdhën drejt tyre, por të 3 shpëtuan.

Çyrbja i pandehur edhe për një çështje tjetër

Më 11 tetor 2024, Çyrbja u mor i pandehur nga SPAK për "shpërdorim detyre" gjatë kohës kur ai ka qenë në krye të hipotekës së Durrësit, çështje që nuk ka lidhje me arrestimin. Në këtë çështje, Çyrbja u kallëzua nga deputeti i PD-së Edi Paloka gjatë fushatës elektorale të 2021 dhe opozita e akuzonte se shpërndau leje legalizimesh me qëllime elektorale Gjatë kohës që Çyrbja drejtonte Hipotekën e Durrësit, ai është marrë në pyetje nga Prokuroria e Krimeve të Rënda në atë kohë, pasi dyshohej se kishte favorizuar Emiljano Shullazin për të përfituar prona në Durrës.

Rrëmbimi dhe vrasja e Jan Prengës

Kujtojmë se në shtator të këtij viti, Gjykata e Posaçme vendosi kalimin për gjykim të çështjes në ngarkim të Altin Hajrit. Ky i fundit akuzohet për rrëmbimin dhe zhdukjen e Jan Prengës, më 17 janar të vitit 2020. Hajri është gjykuar në mungesë, pasi nuk ishte bërë e mundur gjetja e tij, bashkë me Gramoz Rexhepin dhe Dritan Funiqin, të tre të cilësuar si organizatorë të rrëmbimit, me motiv konfliktet për shkak të grabitjes së një sasie me 260 kg kokainë në Angli, nga vëllai i Janit.

Trupi i këtij të fundit nuk është gjendur ende dhe cilësohet i vdekur, pasi dyshohet se u torturua për vdekje në ambientet e kompleksit “Golden” pas rrëmbimit dhe më pas trupi u zhduk. Kompleksi është në pronësi të familjes Hajri. Ndërkohë grupi është ndarë në disa pjesë. Më herët gjykata ka dënuar për vrasjen e Prengës me burg përjetë kopshtarin Festim Bixhdilin.

Ora 22:56

Report Tv siguron pamjet nga arrestimi i Jurgis Çyrbjas/ Momenti i shoqërimit në komisariat me pranga në duar (VIDEO)

Një ditë pas arrestimit të ish deputetit socialist Jurgis Çyrbja, janë bërë publike pamjet e momentit kur ai shoqërohet nga efektivët pas ekzekutimit të urdhërarrestit të firmosur nga SPAK.

Report Tv përcjellë videon kur dy efektivë të policisë shoqërojnë ish deputetin socialist me pranga në duar dhe kokën e ulur brenda në ambientet e policisë (20 tetor 2024)

Jurgis Çyrbja akuzohet nga SPAK se ka shfrytëzuar pozitën e tij si deputet i Kuvendit për të ndihmuar dhe informuar Altin Hajrin, një personazh i njohur i botës së krimit, pronar i kompleks super luksoz ‘Golden’ në Shijak dhe në kërkim prej 4 vitesh për vrasjen e Jan Prengës.

SPAK thotë se Çyrbja dhe Hajri kishin miqësi me njëri-tjetrin dhe si deputet Çyrbja ka ndërhyrë në agjencitë e zbatimit të ligjit për t’i ofruar informacione dhe favorizime Hajrit, një person në kërkim për 4 vepra të rënda penale “Rrëmbimi ose mbajtja peng e personit” e kryer në bashkëpunim, “Trafikim i narkotikëve”, “Mbajtja pa leje dhe prodhimi i armëve, armëve shpërthyese dhe i municionit”, “Fshehja dhe asgjësimi i kufomës”.

Ora 10:40

Arrestimi i ish-deputetit Çyrbja, avokatja tërheq në GJKKO materialet hetimore! Deklaron se nuk është marrë asnjëherë në pyetje për çështjen (VIDEO)

Teksa SPAK ndodhet në kulmin e intensitetit për hetimin e dosjes ku ka të arrestuar ish-deputetin socialist të qarkut Durrës, Jurgis Çyrbja, Ahmet Mashën dhe të kërkuarin Altin Hajri, pala mbrojtëse e të dyshuarve ka qenë prezentë sot në ndjekjen e procedurave.

Avokatja e ish-deputetit, Bruna Kullolli, u pa në institucionin e akuzës, ku tërhoqi mëngjesin e kësaj të hëne (21 Tetor) materialet hetimore në Gjykatën e Posaçme Antikorrupsion.

Sipas saj, Çyrbja nuk është marrë asnjëherë në pyetje lidhur me çështjen për të cilën SPAK lëshoi mandat arresti ndaj tij.

Ndaj ish-ligjvënësit rëndojnë 3 akuza të rënda; tregtimi i sekretit shtetëror, përkrahja e autorit të krimit dhe korrupsion zgjedhor.

Këto akuza janë nxjerrë pas verifikimeve dhe hetimeve të komunikimeve të Çyrbjas në platformën e koduar SKY ECC dhe lidhjet që kishte me një grup kriminal në Durrës, duke u bërë shkak edhe për dekonspirimin e operacioneve policore.

Avokatja e ish-deputetit Çyrbja, sot në GJKKO

Ora 10:18

Sky ECC ‘fundos’ ish-deputetin e PS, burime: Çyrbja dyshohet se ndikoi që të futej në listë të sigurt për deputet në 2021

Gazetarja e Report Tv, Keti Banushi sjell detaje të reja nga arrestimi i ish-deputetit të PS, Jurgis Çurbja, ndaj të cilit rëndojnë 3 akuza "Korrupsion aktiv zgjedhor", "Përkrahje e autorit të krimit" dhe "Tregtimi i sekretit shtetëror".

Burimet thonë se Çyrbja dyshohet se ka ndikuar për të qenë në listë të sigurt për deputet në vitin 2021. Ende nuk ka shumë detaje, ndërsa pritet një njoftim zyrtar i SPAK.

Po ashtu, burimet thonë se ishte Ahmet Masha dyshohet se ka blerë vota për Jurgis Çyrbjen në 2021. Ai u arrestua bashkë me Çyrbjen, ndërkohë që rezulton se është edhe kunati i vëllait të ish-deputetit.

Burimet bëjnë me dije se për këtë çështje priten masa të tjera arresti. Ndërkohë, Çyrbja është në akuzë edhe për "Përkrahje e autorit të krimit", pasi dyshohet se ka strehuar në banesë Altin Hajrin, pas vrasjes së Jan Prengës në janar 2020.

Për akuzën e tretë, tregtim i sekretit shtetëror, pritet që SPAK të japë më shumë detaje, por mund të lidhet edhe me faktin që Çyrbja ka qenë pjesë e Komisionit të Sigurisë në Kuvend. Gjithçka dyshohet se është zbuluar nga bisedat në Sky ECC.

Ora 09:25

FOTO/ Ky është kompleksi luksoz ‘Golden’ i Altin Hajrit! Prej katër vitesh në kërkim, u strehua nga Çyrbja pas vrasjes së Jan Prengës