Drejtuesi i Koalicionit Euroatlantik, Lulzim Basha përjashtoi çdo lloj bashkëpunimi pas zgjedhjeve të 11 majit me forca që nuk mbështetin 3 pikat e panegociueshme të shpallura të programit të KEA-s: Lufta ndaj korrupsionit, mbështetja pa kushte ndaj SPAL dhe linjëzimi me partnerët strategjikë ndërkombëtarë.
Kontratën e lobimit 6 mln dollarë të PD-ADSHM me kompaninë amerikane “Continental” ai e cilësoi si një “kontratë për hallet personale të familjes së Sali Berishës”, që tani edhe shumë demokratë e kuptuan të vërtetën, duke u bërë thirrje që të mbështesnin Koalicionin Euroatlantik më 11 maj, pasi ishte PD-ja e vërtetë.
I ftuar sot në ‘Studio Live’ të Report Tv, teksa i përgjigjej pyetjeve të moderatorit Arbër Hitaj, ai deklaroi se KEA nuk ka në listat e kandidatëve “mish dhie” siç ka futur PD-ja e Berishës, me ish-gjyqtarë e prokurorë të shkarkuar nga Vetingu (i referohet gjyqtarit sheik Gjin Gjoni dhe ish-prokurorit Arjan Ndoja), me Ilir Metën dhe me Elvis Roshin.
“Kush voton për numrin 1, nxjerr Metën nga qelia dhe e bën deputet, bën Elvis Roshin dhe gjyqtarët dhe prokurorët e shkarkuar nga vetingu, si dhe liron shokët e Ramës nga 313-a”, tha Bsasha me stë tjerash.
Ai shpjegoi erdhe arsyen pse dy forcat e mëdha nuk donin votimin elektronik.
“Të bëhej identifikim me shenja gishtrinjsh, pasi të dhënat janë të siguruara dhe numërimi elektronik ishte i mundur, sikurse në vende të tjera. E kundërta ndodhi, me keqadministrim dhe kjo është një hile. Pasojat i shohim me atë që ka ndodhur në Greqi. Megjithatë ne kemi vijuar punën në takimet me diasporën në të gjitha vendet si Angli, Itali, Greqi, Gjermani etj. Kemi dashamirësinë e njerëzve që duan ndryshim, pasi për 4 vite ka pasur më shumë korrupsion dhe varfëri. S’mund të ketë riciklim të rrangallave. Lufta siç shpall Berisha nuk bëhet as me Ilir Metën dhe as me Elvis Roshin në listat e kandidatëve për deputetë”, tha Basha.
I pyetur për kontratën e lobimit 6 mld dollarë të PD-së, Basha tha se:
“Gjithçka bëhet për të fshehur një të vërtetë që nuk e fshehin dot më, hallin personal të familjes së Berisha dhe anën tjetër të marrëveshjeve të fshehta mes Ramës dhe Berisha. Nëse votojnë Ramën dhe numrin 5 është për të nxjerrë shokët e Ramës nga 313-a, nëse votojnë 1-shin do nxjerrin Ilir Metën nga burgu dhe do e bëjnë deputet. Demokratët e kuptuan tani se kush është PD-ja e vërtetë”.
Ai i bëri thirrje të gjithë shqiptarëve që të mos votonin për të liruar të korruptuarit nga burgu dhe se pas 11 majit, nëse KEA do ketë në dorë numrat për qeverinë si ‘kingmaker’, ai vuri tre kushte, duke mohuar bashkëpunimin me të korruptuarit.
“Thirrja ime është për socialistët e ndershëm, jo për ata 7 herë 7 bëjnë 313, por për ata që mezi sigurojnë kafshatën e gojës. Teksa të tjerëve u myken paratë, shumë qytetarë nuk nxjerrin dot muajin. Shpresa është Koalicioni Euroatlantik. Po qajnë hallin e përbashkët, por koston e ka PD-ja. Koalicioni Euroatlantik ekziston si një kauzë e madhe, kush e sheh për interesa personale është jashtë këtyre listave dhe koalicionit tonë. Nuk jemi për të ricikluar figurat e konsumuara të korrupsionit apo shokët e Ramës, që një pjesë janë në burg dhe të tjerët rrugës për atje. Asnjë bashkëpunim me të korruptuarit, asnjë bashkëpunim me ata që nuk ndihmojnë SPAK dhe reformën në drejtësi, asnjë bashkëpunim me ata që nuk janë të linjëzuar me partnerët tanë strategjikë”, tha Basha, duke shpallur edhe 3 kushtet.
Madje kreu i Demokratëve Euroatlantikë akuzoi dy forcat e mëdha politike edhe për vjedhjen e programit elektoral, sidomos për pjesën e pensioneve dhe atë ekonomik.
“Edhe programin për pensionin e morën nga i yni dhe e kanë bërë si lojë kungulleshkash, teksa bëjnë lojëra fjalësh për luftën ndaj korrupsionit. Kjo është tallje që i bëjnë ata qytetarëve. Me ne gjithçka nis me luftën ndaj korrupsionit, mbështetje ndaj SPAK-ut. Nëse ke plan të fshehtë, do kemi përsëritje të 4 viteve të fundit, do kesh sulm ndaj drejtësisë, korrupsion, varfëri, mungesë mbështetje ndaj fermerëve, as rritje rrogash e pensionesh”, nënvizoi Basha.
Ai apeloi që shqiptarët të zgjidhnin numrin 4 në fletën e votimit më 11 maj, pasi është PD-ja e vërtetë, ndryshe nga çfarë kanë treguar dy forcat e mëdha, duke përdorur edhe termin “mish dhie” për ta.
“Partia Demokratike e vërtetë është Koalicioni Euroatlantik. Ne jemi ata që siç thotë populli nuk kemi “mish dhie” si Elvis Roshi, si Ilir Meta, si gjyqtarët dhe prokurorët e shkarkuar nga Vetingu të futur nëpër lista. Shpresa është mbivendosur te PD-ja, me hallet personale mbi ato të vendit dhe partisë dhe shumë demokratë tani e kanë kuptuar. Çdo demokrat tani e di, e gjen veten te KEA dhe numri 4, e jo te lista me Ilir Metën dhe çdo sejmen tjetër. Lista e PD përfaqëson hallet personale të Berishës dhe Metës, ashtu sikurse edhe listat e Ramës”, u shpreh Basha për Report Tv.
Drejtuesi i Koalicionit Euroatlantik për zgjedhjet parlamentare të 11 majit, Lulzim Basha, e la të hapur derën e bashkëpunimit me të gjitha partitë politike progresiste që do marrin mandate deputetësh.
Basha u pyet edhe për raportin politik me partitë e vogla apo të reja nëse do të dalë “kingmaker” pas 11 majit.
“Partive të reja u uroj suksese. Sfidë e madhe që t’u tregojnë shqiptarëve se janë përtej interesave personale dhe më afër shqiptarëve. Bashkëpunim me ta vetëm nëse zbatojnë 3 linjat që shpalla më sipër, mbështetja ndaj SPAK, lufta kundër korrupsionit dhe linja me partnerët strategjikë dhe të BE-së”, tha ai për ‘Studio Live’.
Basha dha edhe një mesazh nga studio e Report Tv për kryesocialistin Edi Rama, pas serisë së video-dising virtual në rrjetin social që prej nisjes së fushatës, me “7 herë 7 bëjnë 313” apo “ku i ke shokët?”.
“Në raport me Ramën mesazhi për të është se ka ardhur koha që të largohet. Nuk ka çfarë i jep më Shqipërisë, përveçse ta dëmtojë. Nuk ka më histori, 7 herë 7 bëjnë 313, ku i ke shokët, sepse bëjnë 313 dhe pyetja pse i ke shokët atje? Nuk janë një, dy, katër, por me dhjetëra, zyrtarë të të gjithë niveleve. Dhe ti thua se më hanë kumbulla e dardha pas shpine, kjo tregon ose je i paaftë, ose sa herë fut dorën nxjerr nga një hajdut, ose je pjesë e korrupsionit dhe ka ardhur koha që të largohesh”, përfundoi Basha fjalën e tij, me një tjetër ‘ngacmim politik’ në distancë ndaj kreut të qeverisë.
Lulzim Basha tha se Koalicioni Euroatlantik ka një mbështetje të madhe qytetare si brenda vendit, ashtu edhe në diasporë.
Ai u shpreh optimist edhe në rezultatin që do marrin më 11 maj, duke u shprehur se pretendojnë deputetë në të gjitha qarqet dhe në veçanti në të mëdhatë, ku edhe sistemi elektoral e mundëson.
Por përqendrimi mbetet Tirana, e cila ka edhe numrin më të madh të votuesve dhe mandateve.
“Në Tiranë duke qenë se ka numrin më të madh të mandateve dhe votuesve. Por fushata është e shtrirë anembanë vendit, ku është mirëpritur edhe KEA. Sondazhet nuk kanë lidhje me realitetin, ato që shpallin sondazhet për KEA ne i marrim vetëm në Kamëz. Një tjetër zonë me mbështetje për ne është edhe Shkodra. Qytetarët kanë një çelës së rëndësishëm më 11 maj, të votojnë dhe të hapin derën e 313-ës, por edhe të derës së të ardhmes së tyre. Dilni dhe votoni më 11 maj. Thirrja 7 herë 7 bëjnë 313 është bërë refren i kësaj fushate. Ne jemi të hapur për bashkëpunim, për t’i dhënë qeverisjen dhe qeverinë që meriton, se Shqipëria dhe shqiptarët meritojnë më shumë, dhe programi ynë e realizon këtë”, tha Basha për ‘Studio Live’.
I pyetur për fushatën në Diasporë dhe pritshmëritë, ai nënvizoi për Report Tv:
“Presim një numër jo të vogël votash edhe nga diaspora, kemi mbështetje të jashtëzakonshme. Ka shumë mbështetës në diasporë ndaj programit dhe koalicionit tonë. Të vetmi që mbështesin pa kushte SPAK jemi ne, Koalicioni Euroatlantik, bashkë me shumicën e shqiptarëve. Korrupsioni është pengesa kryesore e vendit për zhvillim dhe integrim, pasi është faqja e zezë e Shqipërisë”.
Komente
