SHBA - Bayern Munich ka dhuruar një spektakël golash në debutimin e tyre në Kupën e Botës për Klube, duke mposhtur bindshëm 10-0 skuadrën neozelandeze të Auckland City. Ndeshja u zhvillua në “TQL Stadium” të Cincinnatit, ku kampionët e Gjermanisë dominuan nga fillimi në fund.
Që në minutat e para, bavarezët treguan forcën e tyre, duke realizuar me Kingsley Coman, Sacha Boey dhe Michael Olise. Coman dhe Olise do të kompletonin dopietat e tyre brenda pjesës së parë, ndërsa Thomas Muller shënoi gjithashtu për të thelluar shifrat.
Në pjesën e dytë, protagonisti kryesor ishte Jamal Musiala, i cili realizoi tre gola, duke kompletuar një “tripletë” personale dhe duke vulosur fitoren spektakolare të skuadrës gjermane.
Bayern do të zhvillojë ndeshjen e radhës më 21 qershor ndaj gjigantëve argjentinas të Boca Juniors, në një duel që pritet me interes të lartë. Për ekipin nga Zelanda e Re në fushë për 90 minuta luajti edhe mbrojtësi shqiptar Regont Murati.
Regont Murati, shqiptari i lindur në Pejë dhe me banim në Zelandën e Re ka debutuar në Kupën e Botës për Klube. Mbrojtësi 29-vjeçar është pjesë e Auckland City prej vitesh, teksa ka dalë nga moshat e këtij ekipi.
Murati luajti si titullar në krahun e djathtë të prapavijës në ndeshjen kundër Bayern Munich duke qenë në fushë gjatë 90 minutave në sfidën e cila në fakt u kthye në një stërvitore për bavarezët, të cilët triumfuan me shifrat 10-0.
Pas Muratit është radha e Kristjan Asllanit të Interit dhe Adrian Bajramit të Benficas që të luajnë në Kupën e Botës për Klube.
Portieri i Auckland City, Conor Tracey, punon në një rol mbikëqyrës në një depo furnizimesh veterinare, duke mbikëqyrur shpërndarjen e produkteve farmaceutike, të ushqimit dhe të barnave të kontrolluara për veterinerët në të gjithë Zelandën e Re.
Para ndeshjes së djeshme ndaj Bayern Munich ai tha: "Më është dashur të bëj një kombinim të pushimit vjetor dhe pushimit pa pagesë. Të luaj kundër Bayern, Benfica dhe Boca, ia vlen 100%." Pavarësisht humbjes, ëndrra e tij u bë realitet pasi luajti kundër idhullit të tij Manuel Neuer.
28-vjeçari bëri shtatë pritje në një ndeshje të vërtetë si Davidi kundër Goliathit. Në fund Bayern Munich fitoi 10-0, por gjithë ekipi i Auckland është krenar për pjesëmarrjen në këtë nivel të Kupës së Botës për Klube.
Komente
