Rreth 80 nxënës të fshatit Kllobçisht në Njësinë Administrative Maqellarë të Dibrës kanë braktisur mësimin prej dy ditësh. Prindër e fëmijë thonë se shkolla e tyre i plotëson të gjitha kushtet ndaj refuzojnë transferimin në një fshat tjetër 3 km larg. Kontaktuar nga Report TV, drejtoresha e Arsimit, Ledjana Gjoka tha se nga “Zyra Vendore Arsimore Dibër nuk ka një vendim për mbylljen e kësaj shkolle dhe nuk do të ketë për sa kohë numri i nxënësve është sipas pëcaktimeve të udhëzimeve të Ministrisë së Arsimit”.
Ajo sqaron më tej se “shkolla e Kllobçishtit aktualisht është shkollë vartëse ku ka nxënës të arsimit fillor dhe komuniteti dëshiron ta kthejë në shkollë qendër”.
Sipas drejtoreshës, kjo është e pamundur pasi shkolla qendër komunitare ndodhet në fshatin Kërçisht i Poshtëm, e cila është ndërtuar me fondet e MAS.
Gjoka sqaron se nga klasa e 6-të deri në të 9-ën duhet ta zhvillojnë mësimin në shkollën 9-vjeçare “Haki Sharofi” të Kërçishtit, pasi është shkollë qendër komunitare dhe nxenesve u mundësohet transporti.
