TIRANË - Kombëtarja shqiptare e futbollit luan dy sfida në shtator. Në datën 4 shtator tanët kanë një përballje miqësore në udhëtim kundër Gjibraltarit, ndërsa më 9 shtator në Tiranë vjen Letonia, sfidë kjo që merr jetë në orën 20:45 dhe vlen për Grupin K kualifikues në Kupën e Botës 2026.
Pasi shpalli listën me 25 emra për këto duele, trajneri Sylvinho doli para medieve për të shpjeguar zgjedhjet e tij. Nga ndeshja e fundit 1-1 kundër Letonisë në Riga, nuk ka ndryshime, mungojnë vetëm të dëmtuarit Ardian Ismajli dhe Alen Sherri.
Sylvinho thotë se nuk bëri shumë ndryshime pasi ndeshja me Letoninë është më shumë se e rëndësishme dhe lojtarët duhet të marrin përgjegjësi në fushë.
"Lista me dy mungesa për dëmtime, na duhet fitorja pasi virtualisht jemi jashtë me një humbje me Letoninë?
Kemi bërë katër gara, mungojnë edhe katër. Në anglisht thonë se "koha punon kundër nesh". Me Letoninë është ndeshja më e rëndësishme. Fola me Ismjalin, ka një dëmtim të lehtë. Edhe me Torinon mungoi. I thashë rri i qetë, rikuperohu në total.
Emrat? Një trajner nuk ndryshon emrat kur ka bindjen se ata bëjnë mirë. Mua më kanë dhënë shenjën se të gjithë duan të stërviten dhe kanë dëshirë e krenari të jenë këtu. Kjo nuk është një ndeshje që ne mund të bëjmë eksperimente, është ndeshja më e rëndësishme me Letoninë. Kemi dy vite që kemi provuar disa gjëra.
Kritikat nga ndeshja e fundit 1-1 në Letoni. Do kemi risi në përgatitjen e sfidës? Forma e Nedim Bajramit dhe Muçit?
Do ketë ndryshime nga ndeshja e fundit. Kemi miqësoren me Gjibraltarin para. Kemi edhe 20 lojtarë të tjerë në mendje. Adrian Bajrami nuk ka bërë një pjesë të plotë. Letonia është ekip i fortë dhe do i përshtatemi. Nedim Bajrami ndoshta nuk është në momentin më të mirë, por ai përgjigjet në fushë. Muçi luajti dje me Besiktas. Ne i mbajmë afër.
Ka qenë i bindur Sylvinho, apo ka pasur dilema për ndonjë emër të ri?
Po, kam pasur. Puna në Kombëtare nis një muaj para. Kam ardhur në Tiranë më 2 gusht, pas pushimeve. Kjo me Letoninë është ndeshja më e rëndësishme, shumë e rëndësishme. Lojtarët që kemi marrë duhet të përgjigjen në fushë, është koha e tyre për të marrë përgjegjësi dhe për të vrapuar. Ky nuk është momenti i emrave të rinj për të provuar, ky është momenti për të marrë përgjegjësi. Janë këta 25 që kemi besim dhe me Letoninë, e përsëris, nuk është e rëndësishme si ndeshje, është shumë e rëndësishme. Na duhen lojtarët që janë mësuar me stilin e lojës. Këto kohë kam menduar shumë, kam biseduar edhe me stafin.
Nëse nuk marrim një lojtar për miqësore (Gjibraltar), kur mund ta kemi?
Kemi tre lojtarë që janë nga U-21 dhe nuk i kemi parë 45 minuta të plota në fushë. Adrian Bajrami, Pajaziti dhe Berisha. Do ketë kohë për të tjerët. Për momentin po vlerësojmë këta emra dhe do ketë mundësi për të tjerë.
Gjibraltari, a është me nivel? Lojtarët vijnë pas pushimeve (forma) dhe a ka presion për rezultatin?
Me një miqësore para ndeshjes zyrtare është pak më e vështirë. Miqësoret të japin mundësi të shohësh lojtarët dhe t'u japësh përgjegjësi për të marrë përgjigje, do jetë një test i mirë. Momenti mund të mos jetë i mirë, pasi disa kanë luajtur në fillim sezoni në disa duele, disa jo. Jemi mësuar.
Dajsinani dhe Aliji nga Superliga, a ka emra të tjerë vendas?
Klevi Qefalija i Dinamos ka bërë ndeshje të mira. Më pëlqen. Është teknik, luan me të majtën, nxjerr topin bukur dhe taktikisht shumë inteligjent, ishte në listën e pritjes. Dje pati një lëndim dhe folëm me Dinamon. Dajsinani (portieri) është i mirë me këmbë, ne shohim personalitetin që në stërvitje dhe në çdo përshëndetje", tha Sylvinho.
Grumbullimi i Kombëtares do të nisë të hënën, më 1 shtator, në Malaga, ku kuqezinjtë do të përgatiten për ndeshjen miqësore ndaj Gjibraltarit, e cila do të luhet më 4 shtator në stadiumin “Europa Point”, në orën 18:00.
Më pas, më 5 shtator, Kombëtarja do të rikthehet në Tiranë për të vijuar përgatitjet në kuadër të ndeshjes kyçe kualifikuese ndaj Letonisë, që do të zhvillohet më 9 shtator, në stadiumin “Air Albania”, në orën 20:45.
Në Grupin K të Kupës së Botës 2026, Shqipëria me pesë pikë pas katër ndeshjeve mban vendin e dytë, katër më pak se Anglia kryesuese. Serbia me katër pikë mban vendin e tretë, por serbët kanë dy ndeshje të luajtura më pak se tanët.
Lista e 25 emrave të ftuar nga Sylvinho
Klevi Qefalija
Klevi Qefalija i Dinamos është nën vëzhgimin e trajnerit të Kombëtares, Sylvinho. 21-vjeçari ka bërë paraqitje të mira me 'Blutë' dhe mesfushori është futur në listën e pritjes nga trajneri Sylvinho. Shumë shpejt ai pritet të jetë pjesë e kuqezinjve, ndërsa ka marrë komplimenta nga Sylvinho.
"Qefalija i Dinamos ka bërë ndeshje të mira. Më pëlqen. Është teknik, luan me të majtën, nxjerr topin bukur dhe taktikisht shumë inteligjent, ishte në listën e pritjes. Dje pati një lëndim dhe folëm me Dinamon", tha trajneri i Kombëtares.
Lëndimi në barazimin Dinamo 1-1 Jagiellonia nuk u duk aq i rëndë dhe Qefalija pritet që në tetor të bashkohet me Kombëtaren. I dalë nga moshat e Tiranës, ku luajti edhe tre sezone me ekipin A të bardhebluve, në verën e 2024 ai kaloi te Dinamo. Katër ndeshje ka luajtur Qefalija me ekipin Shpresa të Alban Bushit.
Komente
