Një komedi që gërsheton konfliktet e brezave, në një realitet tërësisht shqiptar, u ngjit në skenën e teatrit “Petro Marko” në Vlorë. “Dëshira e tretë” e dramaturgut vlonjat Ferdinand Hysi hapi siparin e shfaqjeve teatrale dhe u mirëprit nga publiku.
Është ngjitur me sukses në skenën e ‘Petro Markos’, komedia “Dëshira e tretë” e dramaturgut vlonjat Ferdinand Hysi.
Me regji të Roland Mingës, skenografi të Drini Shehut dhe muzikë të Artur Dhamos, shfaqja u ndoq me interes nga publiku vlonjat që mbushi sallën e teatrit.
Regjisori Roland Minga thotë se kombinimi aktorial i brezave është dhe suksesi i shfaqjes që përçon mesazhin se asnjë mrekulli apo magji nuk mund të zgjidhë hallet e shoqërisë, nëse ka tolerancë.
Për aktoren Eljona Thomaraj shfaqja foli shqip për problemet e shumë familjeve.
Komedia ‘Dëshira e tretë’ ka çelur kështu sezonin e ri për trupën e teatrit të Vlorës.
