TIRANË- I izoluar në qeli që prej 10 shkurtit, kryebashkiaku i Tiranës, Erion Veliaj ka reaguar pas skandalit me “Syri Tv”, ku vetëm një ditë më parë “dëshmitari” italian Gabriele Tarroni Longinotti u tërhoq nga akuzat që kishte bërë ndaj tij, duke pranuar se kishte shpifur në këmbim të parave.
Ndërsa ka ndarë me foto deklaratën noteriale të italianit, në një reagim në Facebook, Veliaj shkruan se gjithçka ishte një kurth që u ngrit ndaj tij, ndërsa vetë Gabriele Tarroni Longinotti pranoi se kryebashkiakun nuk e njeh dhe se ai kurrë nuk ka qenë i përfshirë në blerjen e një inceneratori të dështuar, siç kishte pretenduar në një intervistë të dhënë në televizionin e familjes Berisha në prill 2023.
Kryebashkiaku Veliaj thekson se pikërisht kjo deklaratë, që ishte ngritur si një kurth ndaj tij, pasoi situatën në të cilën ai ndodhet sot. Pas intervistës, Veliaj shkruan se nisën protestat e rreme para Bashkisë së Tiranës, më pas kallëzimi nga anonimi “Nesti Angoni”, vettingu 20-vjeçar ndaj tij, siç ai e cilëson, e deri tek kërcëbimi i dëshmitarëve, persekutimi i familjes dhe izolimi në qeli.
“Po postoj për të gjithë, rrëfimin e parë të një serie rrëfimesh, nga ata që, me ose pa dashje, kontribuan në kurthin e ngritur ndaj meje, që prodhoi një hetim të paligjshëm nga anonimati, një vetting 20 vjeçar të të gjithë jetës sime nga rinia, një Kryeqytet të sabotuar teksa ishte në kulmin e suksesit, një persekutim çnjerëzor të familjes sime, e një izolim grotesk, si të isha kriminel lufte apo drejtues kartelesh.
Lexojeni, se prej kësaj gënjeshtre të parë nisën protestat e rreme, u amplifikuan me kallëzime anonime, u ngjizën akuza me kërcënim dëshmitarësh e u bitis me shkallmimin e Kryeqytetit tonë Tiranës. Ndaj, secili duhet ta lexojë apologjinë noteriale të Gabriele Tarroni Longinotti-t, si leksion për të ardhmen”, shkruan Veliaj.
“Nuk jam hakmarrës”, thotë Veliaj, por thekson se këtë deklaratë zgjodhi ta publikojë për ti dhënë një mesazh, jo vetëm italianit që u pjesë e këtij skandali, por edhe personave të tjerë që u bënë pjesë e këtij fabrikimi, por mbi të gjitha për qytetarët shqiptarë.
“Por, më e rëndësishmja e bëj për çdo shqiptar që jeton me frikë mos përgjohet, kërkon linjë të sigurt të flasë me të shtëpisë, kthen kokën pas mos po e ndjekin, vë gishtin mbi buzë se mos dëgjohet, apo fsheh telefonin poshtë vitheve në karrike! Shqipëria nuk është një koloni penale dhe s’duhet lejuar kurrë kjo re e zezë frike që ka kapluar vendin në emër të drejtësisë së re”, thekson Veliaj.
Në postimin e publikuar në rrjetet sociale, Veliaj mes rreshtave duket se ka edhe një mesazh për përballjen e tij jo vetëm me drejtësinë, por edhe qeverinë, e cila tashmë ka firmosur shkarkimin e tij dhe kërkon zgjedhjet e parakohshme në Tiranë. Ndërsa vendimin e shkarkimit e ka ankimuar në Kushtetuese, Veliaj shkruan se “Jam më i fortë e më i vendosur se kurrë në betejë me të ligën”.
Mesazhi i plotë i Erion Veliajt
Mesazh nga Kryetari i Bashkisë së Tiranës, Erion Veliaj
Uroj të jeni mirë!
Mirënjohje për qindra letrat tuaja, që më japin kurajë çdo ditë. Jam mirë, më i fortë e më i vendosur se kurrë në betejë me të ligën!
Po postoj për të gjithë, rrëfimin e parë të një serie rrëfimesh, nga ata që, me ose pa dashje, kontribuan në kurthin e ngritur ndaj meje, që prodhoi një hetim të paligjshëm nga anonimati, një vetting 20 vjeçar të të gjithë jetës sime nga rinia, një Kryeqytet të sabotuar teksa ishte në kulmin e suksesit, një persekutim çnjerëzor të familjes sime, e një izolim grotesk, si të isha kriminel lufte apo drejtues kartelesh.
Lexojeni, se prej kësaj gënjeshtre të parë nisën protestat e rreme, u amplifikuan me kallëzime anonime, u ngjizën akuza me kërcënim dëshmitarësh e u bitis me shkallmimin e Kryeqytetit tonë Tiranës. Ndaj, secili duhet ta lexojë apologjinë noteriale të Gabriele Tarroni Longinotti-t, si leksion për të ardhmen.
E bëj këtë për disa grupe:
- [ ] Për italianin, që as më njeh e as e njoh, por që nisi një zinxhir jetëshkatërrues ngjarjesh, që të kuptojë se nuk jam hakmarrës, por ai dhe kushdo tjetër këtu në Shqipëri, duhet të kuptojë që fjalët kanë peshë, e kur janë të rreme thyejnë karriera, qytete e familje, që do duan dekada të rikuperohen.
- [ ] Për të tjerët, që u bënë me vetëdije apo me zell politik pjesë e këtij fabrikimi. Dua t’u them se unë jam i burgosur, por nuk jam në burg. Jam i qetë dhe i çliruar në ndërgjegjen time. Shpresoj që të keni fuqi të çliroheni nga burgu i ligësisë suaj ku keni mbyllur veten, pasi e vërteta e rrëfimi do t’ju bëjë të lirë!
- [ ] Por, më e rëndësishmja e bëj për çdo shqiptar që jeton me frikë mos përgjohet, kërkon linjë të sigurt të flasë me të shtëpisë, kthen kokën pas mos po e ndjekin, vë gishtin mbi buzë se mos dëgjohet, apo fsheh telefonin poshtë vitheve në karrike! Shqipëria nuk është një koloni penale dhe s’duhet lejuar kurrë kjo re e zezë frike që ka kapluar vendin në emër të drejtësisë së re.
Ju përqafoj me mall të gjithëve! Do të luftoj për vete dhe për secilin prej jush!
Pjesë nga rrëfimi noterial më poshtë:
(1) Nuk kam parë kurrë z. Erion Veliaj të udhëtojë, vetëm apo në prani të personave të tjerë, në Itali apo të takojë dikë, aq më pak që qëllimi i një vizite të tillë të kishte lidhje me inceneratorin;
(2) Nuk e kam takuar kurrë z. Erion Veliaj, as personalisht as në prani të personave të tjerë, as në Itali as në Shqipëri, në "Cioccolati Italiani" apo "Tribe", dhe as nuk kam komunikuar me të, as personalisht as përmes personave të tjerë, me telefonata, mesazhe apo në ndonjë formë tjetër komunikimi;
(3) Nuk kam as njohuri e as prova që z. Erion Veliaj të ketë marrë pjesë apo të ketë qenë i përfshirë në blerjen e inceneratorit që kishim në Rumani;
(4) Të gjitha deklaratat që kam dhënë në lidhje me z. Erion Veliaj, në intervistat e mia për programin "Piranjat" në "Syri TV", si edhe ato që kam lënë të kuptohet, janë të pavërteta dhe janë bërë prej meje në këmbim të premtimeve nga ana e këtyre mediave televizive dhe personave të afërt me to, për përfitime financiare.
Komente
