Qarkullimi i makinave nga Shqipëria në drejtim të Greqisë përmes tre pikave kufitare në vend është pezulluar ditën e sotme, për shkak se doganierët grekë do të zhvillojnë grevë. Qarkullimi për mjetet është i ndaluar nga ora 07:00 deri në orën 23:00 dhe gjatë kësaj periudhë asnjë makinë nga territori shqiptar nuk do të lejohet të kalojë drejt territorit grek përmes tre pikave kufitare, Kakavijës në Gjirokastër, Qafë Botës në Sarandë dhe Tre urat në Përmet.
Policia Kufitare e Janinës ka sqaruar se gjatë kësaj periudhe do të lejohen vetëm këmbësorët pa bagazhe dhe rastet emergjente.
Prej orës 07:00 në Kakavijë nuk ka lëvizur asnjë mjet transportues udhëtarësh apo mallrash, veçse një rast emergjent. Disa qytetarë në Kakavijë flasin për Report TV, ku thonë se nuk kishin dijeni për bllokimin.
“Nuk e di fare, tani e mora vesh. Nuk pashë lajme, po të kisha parë lajme s’do kisha ardhur. Unë jam me automjet, do pres këtu ca do bëj.
Unë kam ardhur nga Vlora, do iki në Greqi. S’kemi marrë njoftim, erdha për babin se e kam të sëmurë. I kam fëmijët në Greqi.
Të vijë Rama këtu, nuk shkojmë dot as për njerëzit që na vdesin”, thonë ata.
Nisur nga kjo situatë, Policia Kufitare apelon për të gjithë qytetarët dhe drejtuesit e automjeteve që kanë planifikuar lëvizjen drejt Greqisë, të gjejnë alternativa të tjera për të udhëtuar dhe të shmangin grumbullimin në pikat kufitare të sipërpërmendura.
E gjithë Greqia është paralizuar për shkak të protestave që do organizohen në 2 vjetorin e tragjedisë së përplasjes së dy trenave në aftësi të Larisës.
Komente
