Policia e Vlorës ka arrestuar një 32-vjeçar me inicialet J.Sh., në kuadër të operacionit të koduar 'Ice'.
Mësohet se në shtëpinë e të riut, banues në zonën e Ujit të Ftohtë, policia gjeti tre armë zjarri.
Sipas raportimeve janë sekuestruar 2 kallashnikovë dhe 1 pistoletë.
Sakaq, blutë e Vlorës kanë gjetur edhe 4 kilogramë kanabis.
Njoftimi i Policisë
Finalizohet operacioni policor i koduar “Ice”, për goditjen e veprimtarisë kriminale në fushën e narkotikëve dhe armëmbajtjes pa leje. Operacioni i zhvilluar nga Komisariati i Policisë Vlorë, në bashkëpunim me Seksionin e Hetimit të Narkotikëve dhe Trafiqeve në DVP Vlorë. Sekuestrohen 3 armë zjarri, municion luftarak dhe 4 kg kanabis. Vihet në pranga poseduesi i tyre. Në vijim të punës për parandalimin dhe goditjen e veprimtarisë kriminale në fushën e narkotikëve dhe armëmbajtjes pa leje, bazuar dhe në informacionet e marra në rrugë policore, nga shërbimet e Komisariatit të Policisë Vlorë, në bashkëpunim me Seksionin e Narkotikëve dhe Trafiqeve të Paligjshme në DVP Vlorë, u organizua dhe u finalizua me sukses operacioni policor "Ice".
Si rezultat i këtij operacioni u arrestua në flagrancë shtetasi J. Sh., 32 vjeç, banues në lagjen "Uji i Ftohtë", Vlorë. Shërbimet e Policisë, gjatë kontrollit të ushtruar në banesën e këtij shtetasi, kanë gjetur dhe sekuestruar në cilësinë e provës materiale 3 armë zjarri (2 kallashnikovë dhe 1 pistoletë), municion luftarak dhe 4 kg lëndë të dyshuar narkotike cannabis sativa. Materialet në ngarkim të shtetasit J. Sh. i kaluan Prokurorisë pranë Gjykatës së Shkallës së Parë Vlorë, për veprat penale "Prodhimi dhe shitja e narkotikëve" dhe "Mbajtja pa leje dhe prodhimi i armëve, armëve shpërthyese dhe i municionit".
