“Ne mirëpresim ofertat nga Aleatët për të ndërtuar objekte të NATO-s.”
E menjëhershme ishte përgjigjja zyrtare e NATO-S pas propozimit të kryeministrit Edi Rama për investimin në Porto Romano.
Ekskluzivisht për Report Tv, një zëdhënës i lartë i Aleancës së Euroatlantikut i tha gazetarit Ermal Qori se: “Lidhur me Porto Romanon, ne përgëzojmë investimet e Shqipërisë në infrastrukturë të përshtatshme."
"Ekspertët tanë i shqyrtojnë oferta të tilla bazuar në kërkesat ushtarake të përcaktuara nga planifikuesit tanë ushtarakë”,- thuhet në përgjigjen zyrtare.
Këtë të mërkurë kreu i qeverisë Shqiptare Edi Rama u prit në selinë e Natos nga sekretari i përgjithshëm Mark Rutte.
Pas takimit Rama foli edhe për një nga projektet strategjike më të rëndësishme që vendi synon të realizojë në bashkëpunim me NATO-n, ndërtimin e një porti të ri ushtarak në Porto Romano.
“Jemi shumë të interesuar të diskutojmë me ju për hapat e mëtejshëm që mund të ndërmarrim për të bërë të mundur ndërtimin e portit të ri ushtarak në Porto Romano-“vijoi Rama.
Shqipëria shihet si një aleate e besueshme dhe besnike e NATO-S, në këtë kuadër vendi ynë do të organizoj samitin e arshëm të aleancës Euroatlantike në vitin 2027.
Eksperti i sigurisë Faik Basha ka deklaruar se një bazë ushtarake në ‘Porto Romano’, është shumë e rëndësishme jo vetëm për Shqipërinë, por edhe për rajonin.
Basha i ftuar në Report Tv, në emisionin ‘Studio Live’ të moderuar nga Ermal Qori, tha se i vetmi vend që mund të sjellë probleme në Europë është Serbia, për shkak të lidhjeve të kësaj të fundit me Rusinë dhe Kinën.
“Për Ballkanin dhe Europën, nëse ka një vend që ka treguar marrëdhënie të shkëlqyera me Rusinë edhe Kinën, është Serbia. Pra i vetmi vend që mund të sjellë problematika, është Serbia. Shqipëria është afër gjeografikisht afër Serbisë, ka edhe raportin me Kosovën, dhe fakti që jemi anëtarë të NATO, do të thotë që është një pikë e favorshme për të pasur një bazë.
NATO ka dy baza në Greqi, disa në Itali dhe vazhdon pastaj në pjesën e Francës, vazhdojnë deri në Spanjë.
Edhe Kroacia ka disa baza, por jo të kësaj natyre që do të ndërtohet në Porto Romano. Kështu që një bazë në këtë rajon, është shumë e rëndësishme për koordinimin. Mund të vendosen elementë që mund të koordinohen me bazën që ndodhet në Rumani.
Mund të përdoret për sistemin e mbrojtës kundërajrore, mund të përdoret për emergjencat civile, mund të përdoret për furnizimin e anijeve dhe mjeteve lundruese të NATO. Pra është një bazë që i vjen në ndihmë. Duke pasur një bazë të NATO në Porto Romano, do të thotë që mund të ketë lëvizje më të shpejtë, ka reagim më të shpejtë dhe ka koordinim më të gjitha bazat e Mesdheut. Kështu që është pikë kyçe, e domosdoshme dhe prandaj përgjigja ka qenë pohuese”, tha Faik Basha në Report Tv.
Komente
