FNSH dhe forcat operacionale ngritën pika kontrolli në hyrje të autostradës së Vlorës dhe në disa zona të tjera, me qëllim arrestimin e personave të rrezikshëm.
Prej ditës së djeshme vijojnë kontrollet, në kuadër të operacionit policor “Sundimi i ligjit”, për kapjen e shtetasve të shpallur në kërkim apo të shtetasve që qarkullojnë me armë zjarri dhe të atyre që mbajnë në banesë armë, municion ose drogë.
Ministri i Brendshëm, Taulant Balla, përmes një postimi në rrjetet sociale ka theksuar se armëmbajtja pa leje është një shpërfillje e rëndë ndaj ligjit.
Ndër të tjera, Balla shprehet se Policia e Shtetit ka nisur prej mëngjesit të djeshëm goditjen me vendosmëri të këtij fenomeni përmes operacionit kombëtar “Sundimi i Ligjit”.
"Armëmbajtja pa leje është gjithmonë një shpërfillje e rëndë ndaj ligjit dhe një arrogancë e hapur ndaj shoqërisë sonë. Armëmbajtja pa leje është gjithashtu burim potencial i krimeve të rënda kundër personit. Prandaj Policia e Shtetit ka nisur prej mëngjezit të djeshëm goditjen me vendosmëri të këtij fenomeni përmes operacionit kombëtar “Sundimi i Ligjit",- shprehet Balla.
