Njeriu ka tendencën që në disa raste shëndetësore në dukje të lehta, të veprojë me “kokën e vet.” Keqpërdorimi i internetit për tu vetëdiagnostikuar apo përdorimi i gabuar e pa kriter i disa barnave është në dëm të shëndetit.
Por, cilat janë disa nga gabimet që bëjnë njerëzit në përdorimin e medikamenteve.
Marrja e qetësuesve nëse vuani nga urthi
Njerëzit që vuajnë nga urthi nuk duhet të marrin barna qetësuese siç është valiumi. Barna të tilla rrisin gjasat e shfaqjes së urthit gjatë natës me 50 përqind
Marrja e aspirinës çdo ditë pa këshillën e mjekut
Disa njerëz nuk duhet të marrin aspirinë çdo ditë pa këshillën e mjekut. Kjo për arsyen se aspirina mund të shkaktojë gjakderdhje në stomak.
Aspirina rekomandohet për njerëzit që kanë rrezik të lartë të atakut në zemër dhe iktusit.
Heqja dorë nga ilaçet e ankthit papritur
Nëse keni marrë prej shumë kohës medikamente kundër ankthit, nuk rekomandohet që të lini kurën krejt papritur. Flisni me mjekun që të ulë dozën në mënyrë graduale.
Në të kundërt, mund të përballeni me komplikacione të ndryshme siç janë konvulsionet.
Përdorimi i antibiotikëve të vjetër për një infeksion të ri
Nëse në shtëpi keni antibiotikë të një kure të mëparshme dhe dëshironi t’i përdorni ato për një infeksion të ri, jeni dyfish gabim.
Së pari, përderisa ju kanë mbetur antibiotikë, atëherë nuk e keni përfunduar kurën e parë. Së dyti, antibiotikët janë shumë specifikë kundër infeksioneve të ndryshme.
