TIRANË- Në një kohë kur situata e COVID-19 ka pasur disa përkeqësime në shumë shtete te Europës, Greqia ka propozuar marrjen e një mase të re. Për shkak të fluksin të madh të udhëtarëve me Shqipërinë, për shkak të festave të fundvitit, Greqia ka propozuar që kontrolli shëndetësor në pikat kufitare me Shqipërinë dhe vendet e tjera në kufi me të, të kryhen përpara kontrollit të pasaportave. Lajmi u bë i ditur nga zv. Ministrit të Mbrojtjes Civile të Greqisë Nikos Hardalia në Janinë, i cili argumentoi se ky vendim ka ardhur me qëllimin që të mbrohet stafi i policisë kufitare.
Që do të thotë, në rast se personi del pozitiv, kthehet mbrapsht në vendin e origjinës pa pasur kontakt me efektivët e policisë.
Ndërkohë, Shefi i Stacionit të Policisë Kufitare Kakavijë Vilson Dine ka risjellë edhe në vëmendje kategoritë e personave që lejohen të udhëtojnë drejt Greqisë, si dhe kushtet që duhet të plotësojnë. Në një bilanc të përgjithshëm, Dine ka dhënë edhe shifra konkrete të shqiptarëve që kanë hyrë dhe kanë dalë nga kjo pikë e kalimit kufitar.
"Gjatë kësaj periudhe kanë hyrë në Republikën e Shqipërisë nëpërmjet P.K.K. Kakavijë, 338.899 shtetas, nga të cilët 242.536 shqiptarë dhe 96.363 shtetas të huaj dhe 114.133 automjete, ndërsa kanë dalë nga Republika e Shqipërisë 352.088 shtetas shqiptarë e të huaj dhe 121.496 automjete", tha Dine.
Shefi i Stacionit të Policisë Kufitare Kakavijë Vilson Dine ka listuar edhe një herë të gjitha kategoritë që lejohet të kalojnë kufirin dhe kushtet që duhet të plotësojnë, teksa thekson se orari i funksionimit të Kakavijës është çdo ditë nga ora 07:00 deri në 22:00, ndërsa kamionët lejohet të kalojnë në harkun kohor 06:00-20:00.
Aktualisht lejohen të udhëtojnë drejt shtetit grek shtetasit
Grek;
Shqiptarë me leje qëndrimi greke;
Shtetasit minoritarë të pajisur me kartën e veçantë;
Trupi diplomatik për arsye pune;
Shtetas shqiptarë të pajisur me autorizim të veçantë nga përfaqësitë diplomatike greke, për arsye pune apo shëndetësore;
Të gjithë drejtuesit e kamionëve dhe furgonëve që transportojnë mallra;
Kushtet
Të ketë plotësuar më parë dhe të ketë të printuar formularin PLF (Passanger Locator Form) në adresën elektronike ëëë.travel.gov.gr;
Të ketë test PCR me rezultat negativ, në gjuhën angleze me të dhënat personale dhe numrin e dokumentit të udhëtimit.
Sqarojmë se sipas një vendimi të Qeverisë Greke të muajit dhjetor, të gjithë shtetasit shqiptarë që ndodhen në Shqipëri dhe kanë leje qëndrimi greke të cilës i ka mbaruar afati, duhet të pajisen me një vërtetim nga Konsullata/Ambasada greke në Shqipëri me qëllim që të lejohet të kalojnë kufirin në palën greke.
Dalja nga Republika e Greqisë dhe hyrja në Republikën e Shqipërisë është e lirë dhe pa kufizime, por të gjithë shtetasit që duan të udhëtojnë drejt kësaj Pike Kalimi duhet të dijnë se orari i funksionimit është çdo ditë nga ora 07:00 deri në 22:00, ndërsa kamionët lejohet të kalojnë në harkun kohor 06:00-20:00.
