Himarë-Një turist amerikan i cili kishte mbetur i bllokuar në zonën e plazhit të Akuariumit është ndihmuar nga Policia e Himarës dhe Policia Kufitare Dhërmi.
Ngjarja është regjistruar një ditë më parë, ndërsa bëhet me dije se turisti ishte dëmtuar në këmbë gjatë eksplorimit të terrenit.
Pas lokalizimit policia e ka transportuar në Spital për mjekim të specializuar.
Njoftimi i policisë:
Policia e Himarës dhe Policia Kufitare Dhërmi i vijnë në ndihmë një shtetasi amerikan të bllokuar në zonën e plazhit të Akuariumit.
Ditën e djeshme, Salla Operative mori njoftim se një shtetas amerikan kishte mbetur i bllokuar në një zonë të thepisur pranë plazhit të Akuariumit, për shkak të dëmtimeve në këmbë gjatë eksplorimit të terrenit.
Menjëherë pas marrjes së njoftimit, shërbimet e Komisariatit të Policisë Himarë, në bashkëpunim me ato të Policisë Kufitare Dhërmi, organizuan ndërhyrjen. Shtetasi u lokalizua dhe u nxor nga zona ku ishte bllokuar, me mjet lundrues gomone, dhe më pas u transportua në Spitalin e Himarës, jashtë rrezikut për jetën.
Turisti falënderoi shërbimet e policisë për ndihmën e menjëhershme dhe profesionalizmin e treguar.
Policia mbetet e angazhuar për të garantuar sigurinë dhe për të ofruar ndihmë në çdo situatë emergjente.
Komente
