Një subjekt tregtar është ndëshkuar me masë administrative prej 100 000 lekësh, pasi mjeti i tij lundrues hodhi mbeturina në det dhe qëndroi në shkelje të perimetrit të sigurisë ujore në plazhin e Dhërmiut.
Për këtë rast, nisi edhe procedimi penal në gjendje të lirë për drejtuesin e mjetit lundrues, shtetasin G. I., 25 vjeç, për veprën penale “Ndotja e ujërave”.
"Hodhi mbeturina në det gjatë pastrimit të mjetit lundrues dhe shkeli perimetrin e sigurisë ujore, procedohet penalisht drejtuesi dhe ndëshkohet me masë administrative 100 000 lekë, subjekti tregtar që kishte në pronësi mjetin lundrues.
Shërbimet e Policisë Kufitare Dhërmi, në bashkëpunim me Njësinë Policore Detare, krahas patrullimit të vijës bregdetare, me qëllim garantimin e rendit dhe sigurisë publike në zonat turistike, kanë ndërhyrë menjëherë në plazhin e Dhërmiut, pas denoncimit se nga një mjet lundrues po hidheshin mbeturina në det dhe po qëndronte afër bregut, duke shkelur perimetrin e sigurisë ujore për pushuesit.
Pas lokalizimit të mjetit lundrues, shërbimet e Policisë Kufitare kanë ndëshkuar subjektin tregtar që kishte në pronësi skafin, me masën administrative 100 000 lekë, për shkelje të nenit 24/c “Zhvillimi i aktiviteteve jashtë zonave të kufizuara”, të ligjit nr. 43/2020.
Gjithashtu, në vijim të veprimeve për këtë rast, u referuan materialet në Prokurori për veprën penale “Ndotja e ujërave” dhe nisi procedimi penal në gjendje të lirë për drejtuesin e mjetit lundrues, shtetasin G. I., 25 vjeç, pasi gjatë pastrimit të mjetit kishte hedhur mbeturina në det", njoftoi Policia.
Policia Kufitare apelon për të gjithë përdoruesit e mjeteve lundruese që të respektojnë me rigorozitet perimetrin e sigurisë ujore për pushuesit dhe të shmangin çdo veprim që mund të rrezikojë sigurinë publike apo të dëmtojë mjedisin detar.
Komente
