Real Madrid u mposht me përmbysje 2-1 të shtunën nga Real Betis. Pas javës së 26-të në La Liga "Galaktikët" e shohin veten në pozitën e tretë me 54 pikë, ndërsa trajneri Carlo Ancelotti foli pas ndeshjes.
Italiani kritikoi të tijtë dhe tha se me këtë lojë është e vështirë që të fitohet dhe se rivalët e merituan. Tanimë mendja është të martën në "Bernabeu", aty ku Real Madrid pret Atletico Madridin në çerekfinalet e Champions League.
“Filluam mirë, por më pas nuk arritëm të ruanim nivelin, angazhimin dhe qëndrimin tonë. Kundërshtarët e merituan fitoren. Kjo është një goditje e rëndë, duhet të reagojmë, është e vështirë të humbasësh në këtë fazë të sezonit, sepse të gjitha skuadrat janë në garë. Nuk luajtëm mirë në këtë ndeshje”, tha fillimisht ai.
Ancelotti më pas u ndal edhe te mungesa e impenjimit nga lojtarët e tij.
"Nuk e di, nuk jam në mendjen e lojtarëve, nuk arritëm të mbajmë ritmin. Humbëm 27 topa në pjesën e parë. Dyshime për Champions League? Nëse luajmë kështu nuk do të fitojmë. Është fare e qartë, shpresoj që të na zgjojë. Dukej si një ekip më kompakt se në ndeshjet e mëparshme”, vijoi Ancelotti.
Trajneri më pas u ndal edhe te zëvendësimi i Mbappe me Endrick, 15 minuta nga fundi i ndeshjes.
"Ai e kishte një problem, u stërvit pak dhe unë preferova ta largoja nga fusha. Puna e dobët në mbrojtje nga sulmuesit? Kur luan mirë, bën presion mbi topin, ne e bëmë këtë në pjesën e parë, por në 70 minutat e tjera ishte e tmerrshme”, tha Ancelotti.
Me ndeshjet e djeshme, Atletico Madrid merr kreun e La Liga me 56 pikë, ndjekur nga Barcelona me 54 pikë (luan sot kundër Sociedad) dhe Real Madrid me 54 pikë.
Komente
