Milani u mposht 1-0 nga Bayer Leverkusen në Gjermani për turin e dytë të Champions League. Kjo ishte humbja e dytë për kuqezinjtë që rrezikojnë tetë vendet e para, ndërsa i një tjetër mendimi ishte trajneri kuqezi.
Paulo Fonseca tha se kjo ishte ndeshja më e mirë për ekipin e tij, duke iu mohuar edhe një penallti.
‘’Ne nuk fituam, por është ndeshja që e kam shijuar më shumë që kur jam këtu. Në pjesën e dytë luajtëm shumë mirë. Jemi të zhgënjyer me rezultatin”, tha fillimisht trajneri.
Fonseca më pas vazhdoi duke komentuar për kontaktin ndaj Loftus-Cheek.
“Kur keni një situatë të tillë, duhet të paktën të shikoni VAR-in. Për mua ishte një penallti. Ata krijuan probleme me kombinimet në krahun e djathtë, por në vështirësi u mbrojtëm mirë”, përfundoi trajneri i Milanit.
