Ikona e kinematografisë shqiptare Margarita Xhepa u shua sot në moshën 91-vjeçare. Vdekja e saj ka trishtuar mbarë opinionin publik, veçanërisht miqtë që kanë punuar me aktoren e madhe shqiptare.
Regjisori, Kiço Londo tha ‘Sot Live në Shqipëri’ se kjo është një humbje dhe tronditje e madhe për të gjithë.
“Është një tronditje e madhe për humbjen e artistes së madhe.Ajo do të jetë përditë me me filmat e saj. Vendosi të shkojë të yjet që e filloi dhe karrierën e saj 80 vjet më parë. Talenti, komunikimi, bukuria e saj, është një humbje e madhe shpirtërore, sot shpirti kombëtar është më i varfër. Kudo ku ajo vinte shpirtin e saj, energjinë e saj, rezultati ishte i arrirë, në kinema, teatër, në recitimet e saj”, tha Londo.
I pikëlluar, regjisori u shpreh se pavarësisht se ajo nuk jeton më e falënderon për çdo gjë që ka bërë për të.
“Kam pasur rastin të punoj me të në një shaqje. Sot ajo nuk dëgjon më po unë i them faleminderit, që i dha shfaqjes një dimension tjetër. Pas 90’ vendi ka pasur ulje-ngritje, por Margarita Xhepa nuk u dorëzua kurrë, e jepte kontributin e saj kudo. E kam pasur një aleate edhe kur kam qenë në Teatrin Kombëtar,nuk ka lënë derë pa trokitur për mua që mos të largohesha nga atje. Të gjithë shqiptarët sot janë në zi” përfundoi regjisori.
Ndërkohë edhe regjisori Esat Musliu e quajti vdekjen e saj një humbje të madhe. Në një intervistë me gazetaren Blerina Goce, Musliu tha se një ditë më parë i kishte dërguar një mesazh urimi për ditëlindje.
“Pata një tronditje kur mora vesh që ka ndërruar jetë. Dje i dërgova një mesazh ditëlindje. Sot e mora vesh nga Facebook. Ishte një aktore e angazhuar, e mrekullueshme dhe nuk më lodhte, me një të lexuar të skenarit më thoshte e mora vesh. Asnjë provë drejt e në xhirim”, tha Musliu.
Më tej ai kujton edhe bashkëpunimet që kishin bërë së bashku.
"Kemi punuar së bashku në dy filma ‘Vitet e pritjes’ dhe ‘Rrethi i kujtesës’.Te vitet e pritjes ishte nënë në rolin e dy vajzave dhe e një djali që e ka në kurbet. Ma ka realizuar atë rol në mënyrë të mrekullueshme. Ka qenë shumë e respektuar nga të gjithë. Çdo rol që i jepje e pranonte pasi lexonte skenarin", tha regjisori.
Në fund Musliu kujtoi edhe një udhëtim që kishte bërë me aktoren e ndjerë dhe Timo Fllokon në Kajro, ku përsëriti edhe një herë aftësinë e saj të mrekullueshme në komunikim.
Komente
