Zemra e një prej ikonave të kinematografisë shqiptare Margarita Xhepa, pushoi së rrahuri në orën 3 të mëngjesit të kësaj të enjteje, vetëm një ditë pasi mbushi 91 vjeç...
Aktorja e mbi 150 roleve në teatër dhe dhjetërave në filma, u shua në një spital privat në Tiranë, ku ishte shtruar për shkak të disa problemeve pulmonare.
Të tronditur, miqtë dhe bashkëpunëtorët e saj të ngushtë, përcollën ngushëllime përmes Report Tv, ku sollën edhe copëza kujtimesh.
“Ka qenë aktore e mrekullueshme, shumë e komunikueshme dhe nuk më lodhte. Ajo me një të lexuar të skenarit drejt e në xhirim. Kemi punuar në mënyrë të mrekullueshme. Sidomos në rolet femërore në moshë madhore kanë qenë brenda karakterit të saj", shprehet Esat Musliu, regjisor.
“Kudo ajo vinte shpirtin e saj, energjinë e saj dhe rezultati ishte i ndriçuar, i arrirë: në kinema, në teatër, në recitimin e poezive, të cilat i bënte aq bukur. Ishte një aktore që do të na mungojë dhe do të kalojë shumë kohë derisa t’i vijë në tokë simotra", tha Kiço Londo, regjistor.
Ngushëllime për këtë humbje të madhe të artit shqiptar përcolli një nga ikonat e tjera të kinematografisë, Robert Ndrenika, bashkëpunimin më të fundit me të cilin e pati në filmin “Bolero në vilën e pleqve”.
“Artistja e madhe deri në vitet e fundit të jetës së saj iu kushtua artit dhe artin e saj e përdori për kauza të rëndësishme në mbrojtje të grave dhe fëmijëve”, thotë në mesazhin e tij presidenti Bajram Begaj.
“Lamtumirë yll”!, shkruajti kryeministri Edi Rama, ndërsa ngushëllime përcollën edhe Ministri i Kulturës, dhe zyrtarë të tjerë të shtetit.
Margarita Xhepa do të përcillet në banesën e fundit të premten, pas homazheve që do të mbahen nga ora 10:00-13:00 në hollin e Teatrit Kombëtar të Operës dhe Baletit.
Presidenti i Partisë së Lirisë, Ilir Meta ka reaguar për ndarjen nga jeta të aktores Margarita Xhepa. Në mesazhin e Metës thuhet se ajo ka lënë trashëgim vlera të mëdha artistike, duke sjellë karaktere me të cilat arti ynë skenik dhe kinematografia është përfaqësuar denjësisht ndërkombëtarisht.
“Me pikëllim të thellë mora lajmin e trishtë për ndarjen nga jeta të yllit të papërsëritshëm të skenës dhe kinematografisë shqiptare, Margarita Xhepa. Një artiste e jashtëzakonshme, e cila mjeshtërisht na la trashëgim shumë vlera të mëdha unike artistike që nga Shekspiri i madh e deri te dramaturgjia e spikatur shqiptare duke skalitur karaktere e duke i ndërtuar aq bukur, me të cilat arti ynë skenik dhe kinematografia jonë është përfaqësuar denjësisht edhe ndërkombëtarisht. “, shprehet Meta.
Meta thotë se humbja e saj është e pazëvendësueshme ndërsa shton se do të kujtohet gjithmonë si e dashur dhe e respektuar, si një zonjë dhe nënë e nderuar që arriti të jepte mesazhe të rëndësishme, duke e vënë artin në shërbim të kauzave madhore sociale dhe ndërkombëtare.
“Gjithmonë e dashur dhe e respektuar, Margarita Xhepa do të kujtohet përherë me mirënjohje për kontributin e vyer për kulturën dhe identitetin tonë kombëtar, e cila edhe si zonjë dhe nënë e nderuar, arriti të jepte mesazhe të përjetshme frymëzuese, njerëzore dhe sociale, përtej fasadave të rreme ideologjike, duke e vënë artin në shërbim të kauzave madhore sociale e kombëtare. Arti shqiptar është sot në zi për këtë humbje kaq të madhe dhe të pazëvendësueshme. Ngushëllimet më të sinqerta për familjen e dashur dhe të madhe Xhepa, që aq shumë i ka dhënë artit shqiptar, si edhe për të gjithë komunitetin e artistëve. I paharruar kujtimi i Saj! Të prehet në paqen e merituar!”, shton ai.
Foto: Margarita Xhepa
Kryeministri Edi Rama ka reaguar pas ndarjes nga jeta të ikonës së kinematografisë shqiptare, Margarita Xhepa.
“Lamtumirë yll”, shkroi Rama krah disa fotove të hershme të aktores së ndjerë.
Foto: Margarita Xhepa
Kryetari i bashkisë së Tiranës, Erion Veliaj, ka reaguar pas humbjes së yllit të kineamtografisë shqiptare Margarita Xhepa.
Përmes një postimi në rrjetet sociale Veliaj shprehet se roli i saj në kulturën shqiptare mbetet i pavdekshëm, teksa nënvizon se aktorja e madhe do t’ju mungojë të gjithëve.
Postimi i plotë:
Margarita Xhepa është një margaritar që do të na mungojë shumë, të gjithëve!
Shumë i trishtuar nga lajmi për ndarjen nga jeta të ikonës se skenës dhe kinematografisë shqiptare, e cila la pas një trashëgimi të jashtëzakonshme, duke prekur zemrat e gjeneratave me talentin, elegancën dhe përkushtimin ndaj artit.
Roli i saj në kulturën shqiptare mbetet i pavdekshëm, ashtu si dhe emocionet që ajo dhuroi me interpretimet e saj.
Ngushëllime të sinqerta familjes, miqve dhe gjithë artdashësve shqiptarë. Kujtimi i saj do të mbetet i paharruar!
Foto: Bajram Begaj
Presidenti Bajram Begaj, shprehu ngushëllime për ndarjen nga jeta të aktores Margarita Xhepa. Përmes një mesazhi drejtuar familjes së saj, komunitetit të artistëve dhe mbarë shqiptarëve, të cilët e kanë admiruar divën e skenës dhe ekranit, Presidenti vlerësoi figurën e Margarita Xhepës si artiste, si grua, si nënë, por dhe rolin e saj në shoqëri.
“Me trishtim mësova se Margarita Xhepa, ylli i skenës dhe ekranit shqiptar, u shua sot. Me interpretimet e saj, ku spikati në mishërimin e figurës së gruas dhe veçanërisht të nënës, Margarita Xhepa çoi dritë dhe u bë pjesë e dashur e familjeve shqiptare.
Artistja e madhe, një figurë publike e respektuar, grua dhe nënë e nderuar, deri në vitet e fundit të jetës së saj iu kushtua artit dhe artin e saj e përdori për kauza të rëndësishme në mbrojtje të grave dhe fëmijëve.
Ngushëllimet e mia më të ndjera shkojnë për familjen, që sot iu nda nga jeta njeriu i tyre i shtrenjtë, për komunitetin e artistëve shqiptarë dhe për mbarë shqiptarët që e kanë ndjekur dhe duartrokitur artin që Margarita Xhepa dhuroi ndër vite”, shkroi Begaj në rrjetet sociale.
Ylli i kinematografisë shqiptare, Margarita Xhepa ndërroi jetë në moshën 91-vjeçare. Aktorja u lind më 2 prill të vitit 1934, në qytetin e Lushnjës, prej ku nisi edhe hapat e parë drejt karrierës së saj.
Nga viti 1950 u aktivizua si artiste probiste në Teatrin Popullor (sot Teatri Kombëtar) dhe njëkohësisht studioi në Liceun Artistik, dega e Dramës.
Ka interpretuar mbi 150 role në teatër, ku përmendim: Majlindën tek filmi ‘Majlinda’, Dafina tek ‘Lumi i vdekur’ , Filja tek ‘Cuca e maleve’ , Zonja Mëmë tek ‘Kush e solli Doruntinën’ , Nëna tek ‘Përballë vetes’etj.
Ka qenë njësoj e suksesshme në rolet e dramaturgjisë botërore, si Ofelia tek ‘Hamleti’, vajza e dytë tek ‘Mbreti Lir’, dado tek ‘Romeo e Xhulieta’, Mbretëresha Margaret tek ‘Rikardi III’, të Shekspirit.
Në rolet e tjera nga dramaturgjia botërore spikasin Klea tek ‘Dhelpra dhe rrushtë’ (Figereido), Lena tek ‘Xhaxha Vanja’ (Çehov), Ledi Milford tek ‘Luiza Miler’, Zonja Berling tek ‘Vizita e inspektorit’ (Pristli), Zonja Lomen tek ‘Vdekja e një komisioneri’, Ana Andrejevna tek ‘Revizori’, Marsela tek ‘Qeni i kopshtarit’ , Mashenka tek ‘Mashenka’, Shejla tek ‘Morali i zonjës Dulska’, apo Dado tek ‘Elektra e Sofokliut’, nën drejtimin e regjisorit grek ‘Dhimitri Mavriqis’, në Teatrin Kombëtar të Greqisë në Athinë.
Veç roleve në teatër, ka realizuar edhe 32 role në kinematografi, duke punuar me shumicën e regjisorëve shqiptarë ku përmendim filmat: “Vitet e para” , “Gjurmët”, “Dimri i fundit”, “Tokë e përgjakur”, “Një djalë edhe një vajzë”, “Apasionata”, “Gjeneral gramafoni”, “Rrethi i kujtesës”, “Vitet e pritjes”, “Dora e ngrohtë”, “Gurët e shtëpisë sime”, “Pranvera s’erdhi vetëm”, “Koncert në vitin 1936”, “E diela e fundit” dhe “I dashur armik”.
Në vitin 1997, interpretoi në filmin grek “Mirupafshim”.
Në maj 2004 u rikthye në skenën e Teatrit Kombëtar, për të shkëlqyer në dramën “Streha e të harruarve”, një tjetër sukses në karrierën e saj 50-vjeçare.
Komente
U prehtë në paqe! Artiste e madhe që do kujtohet me respekt për rolet e saj si në kinematografi ashtu edhe në teatër. Ngushëllime familjarëve.
PërgjigjuYlli i filmit dhe teatrit kombetar shqiptar Margarita Xhepa, do te rroje ne breza si nje margaritar, sic edhe e kishte emrin.
PërgjigjuU prehte ne paqe! Po na ikin artista te cilet nuk e di ne do ti zvendesojme me me kete cilesi.
Përgjigju