Policia italiane ka zbardhur detaje të reja mbi goditjen e bandës së kokainës që vinte nga Spanja, ku ishin të përfshirë edhe shqiptarë. Mediat fqinje shkruajnë se lënda narkotike vinte nga Spanja përmes Francës, e cila më pas paketohej dhe shitej me pakicë në vende të ndryshme.
Destinacioni final i drogës ishte një market i fruta-perimeve, pronar i të cilit ishte një shqiptar, emri i të cilit nuk është bërë i ditur ende. Nga hetimet, ka rezultuar se shqiptari, së bashku me kushëririn e tij, që kishte lidhje të forta me rrjetin e trafikut të drogës, prisnin lëndën narkotike dhe më pas e shpërndanin atë.
Banda e kokainës është zbuluar pas përgjimeve të policisë prej dy vitesh, ku ka rezultuar se ‘kokë’ e trafikut ishte një sicilian, që vepronte mes Rimini, Forli, Cesenatico dhe Cervia. Kanë qenë pikërisht përgjimet e karabinierëve që kanë nxjerrë zbuluar shqiptarin, pronar të marketit, ku dërgohej droga.
