Lumir Abdixhiku
Lidhja Demokratike e Kosovës (LDK) dhe Partia Demokratike e Kosovës (PDK), kanë mbajtur sot tubimet përmbyllëse të fushatave të tyre elektorale, ndërsa zgjedhjet do të mbahen nesër (9 shkurt 2025).
Kandidati për kryeministër nga LDK, Lumir Abdixhiku, premtoi rritje pagash dhe investime në shëndetësi.
"Kosova është një ditë dhe një votë larg pagave më të larta në historinë e saj dhe ndërtimit të spitalit më modern në rajon," tha Abdixhiku, duke theksuar angazhimin e tij për përmirësimin e kushteve ekonomike dhe shëndetësore në vend.
Ndërkohë, kryetari i PDK-së, Memli Krasniqi, i bëri thirrje qytetarëve të mbështesin kandidatin e partisë për kryeministër, Bedri Hamzën. Ai e vlerësoi Hamzën si një politikan të ndershëm dhe të përkushtuar, duke theksuar se PDK ka zhvilluar një fushatë pozitive pa përçarje.
Në zgjedhjet e ardhshme parlamentare garojnë 28 subjekte politike dhe një kandidat i pavarur. Qytetarët do të votojnë për një parti dhe deri në dhjetë kandidatë për deputetë, të cilët do të formojnë Kuvendin e ri me 120 vende dhe më pas do të zgjedhin Qeverinë e re. Aktualisht, qeveria e Kosovës udhëhiqet nga Albin Kurti, kreu i Lëvizjes Vetëvendosje.
Këto zgjedhje janë të parat të rregullta që nga shpallja e pavarësisë në vitin 2008, pas disa cikleve zgjedhore të parakohshme.
Lajmi kryesor:
Zgjedhjet parlamentare në Kosovë/ Përfundon votimi i diasporës në Europë! Morën pjesë mbi 70% e atyre që ishin regjistruar të votonin në përfaqësitë diplomatike! Vijon në SHBA e Kanada
K.M/ReportTv.al