Dom Gjergj Meta me Fortlumturinë e Tij, Joan Pelushi
Kryetari i Këshillit Ndërfetar të Shqipërisë, Dom Gjergj Meta, ka uruar Fortlumturinë e Tij, Joan Pelushin, për zgjedhjen në detyrën e lartë të Kryepeshkopit të Tiranës, Durrësit dhe gjithë Shqipërisë nga Sinodi i Shenjtë.
Urimi i plotë:
Fortlumturia Juaj,
I dashur vëlla Joan,
Me gëzim të madh mora lajmin e zgjedhjes Tuaj nga Sinodi i Shenjtë i Kishës Orthodhokse Autoqefale të Shqipërisë si Kryepiskop i Tiranës, Durrësit dhe gjithë Shqipërisë. Gëzohem bashkë me Ju Fortlumturi e me të gjithë besimtarët orthodhoksë të Shqipërisë e Ju bëj urimet më të sinqerta e vëllazërore, në emër të Këshillit Ndërfetar të Shqipërisë! I denjë!
Fortlumturi e nderuar, janë ende të freskëta në secilin prej nesh ditët që shoqëruam me lutje, në sëmundje dhe në momentin e fjetjes me Zotin, Fortlumturinë e Tij, Anastasi. Figura e tij është dhe mbetet një gurthemeli, jo vetëm për Kishën Orthodhokse, por për të gjithë kombin tonë e për bashkësitë fetare në vend.
Tani Kisha Orthodhokse ka një Barit të ri e ne të gjithë kemi fituar një bashkëudhëtar tjetër në rrugën e dialogut ndërfetar në vendin tonë. E lusim Hyji, që të qëndrojë gjithmonë mbi Ju e të jeni një Bari i mirë për besimtarët orthodhoksë e një zë i fuqishëm e bashkëpunues me të gjithë faktorët fetarë e civilë të shoqërisë tonë.
Po ashtu presim me padurim që të vazhdojmë së bashku punën në rrugën e dialogut dhe të harmonisë midis besimeve fetare në Shqipëri në kuadër dhe të rolit tuaj të ri si anëtar i Presidencës së Këshillit Ndërfetar të Shqipërisë.
Zoti ju bekoftë!
Dom Gjergj Meta
Kryetar i Këshillit Ndërfetar të Shqipërisë!
Lajmi kryesor:
Fortlumturi Joani zgjidhet drejtuesi i Kishës Ortodokse: Detyrën do ta zbatoj me devotshmëri! Uron Patriarku i Konstandinopojës
K.M/Xh.K/ReportTv.al
