ITALI-Një operacion i Guardia di Finanza dhe policisë shqiptare është finalizuar me sekuestrimin e 550 kilogramëve marijuanë në Brindizi. Droga dyshohet se vinte nga Shqipëria. Në pranga kanë rënë dy skafistë, një 33-vjeçar italian me inicialet W.F dhe një shqiptar 29 vjeç, me inicialet V.B. Nëse droga do hidhej në treg do kapte vlerën e 5 milionë eurove.
Njoftimi i policisë shqiptare
“Policia e Shtetit dhe forcat policore italiane në veçanti Guardia di Finanza e Pulias kane finalizuar nje tjeter operacion duke goditur tentativen per trafik narkotikesh drejt Italise.
Autoritetet arrestuan 2 trafikantet, nje shtetas italian me iniciale E.F. dhe shtetasi shqiptar me iniciale V.B. Ne Brindizi u kap dhe sekuestrua skafi me te cilin u tentua te trafikohej droga, si dhe 550 kg marijuane.
Njoftimi i Guardia di Finanza
Skafi ishte 6.5 metra i gjatë dhe është sinjalizuar nga patrullimi i agjencisë Frontex, në zonën e ujërave ndërkombëtarë dhe po shkonte drejt brigjeve italiane. Në pjesën e galixhantit, nga mbingarkesa skafi ishte zhytur shumë poshtë, duke u pikasur menjëherë. Më pas, policia e ka arritur mjetin dhe i ka bërë thirrje të ndalojë. Trafikantët tentuan të arratiseshin në det, dhe rritën shpejtësinë, por pas ndjekjes nga Reparti Operativ Aeronaval, ata u arrestuan. Brenda 1 jave, policia italiane ka kapur dy gomone të mbushura me drogë që vinin nga Shqipëria. Më 25 gusht, po në Brindizi, u arrestuan dy vlonjatë dhe u sekuestruan 535 kilogramë marijuanë. Ndërsa, më 30 gusht, një sasi prej 700 kilogramë marijuanë u tentua të trafikohej drejt Italisë, por u kap në kanalin e Otrantos. Në pranga ranë sërish dy shqiptarë. Që nga fillimi i këtij viti, sipas të dhënave zyrtare, janë sekuestruar 14 mjete lundrimi, mbi 14 tonelata marijuanë dhe 35 skafistë janë arrestuar nga Guardia di Finanza në Puglia.
Komente
