Presidenti ukrainas ka dalë sot për herë të parë nga territori i Ukrainës që prej fillimit të luftës nga Rusia. Ai ka mbërritur në Shtetet e Bashkuara të Amerikës ku është pritur në Shtëpinë e Bardhë nga presidenti Joe Biden. Vizita u bë e ditur nga Uashingtoni ndërsa u morën të gjitha masat për siguri maksimale gjatë udhëtimit të presidentit ukrainas.
“Në rrugën time për në SHBA për të forcuar aftësitë elastike dhe mbrojtëse të Ukrainës”, shkroi Zelensky në Twitter.
Ai tha gjithashtu se do të mbajë një fjalim në Kongres dhe do të mbajë një sërë takimesh. Po ashtu dhe Uashingtoni ka konfirmuar se Zelensky do të udhëtojë sot drejt SHBA dhe do të vizitojë Shtëpinë e Bardhë dhe Kongresin Amerikan.
SHBA ka qenë aleati më i rëndësishëm i Ukrainës në luftë, duke dhënë 50 miliardë dollarë ndihmë humanitare, financiare dhe të sigurisë, shumë më tepër se çdo vend tjetër.
Zelensky ka zhvilluar telefonata të rregullta me liderët perëndimorë që nga fillimi i luftës. Por, vizita e tij në Shtëpinë e Bardhë, dhe takimi me presidentin Biden do të sinjalizojë se Uashingtoni është i përkushtuar të mbështesë vendin për aq kohë sa duhet, sikurse është thënë vazhdimisht.
Në konferencën e saj përpara vizitës së Zelensky, Shtëpia e Bardhë konfirmoi një paketë të re prej afro 2 miliardë dollarë ndihmë për sigurinë për Ukrainën. Kjo përfshin një bateri të re raketore “Patriot”, një sistem i sofistikuar i mbrojtjes ajrore që do të ndihmojë Ukrainën të mbrojë qytetet e saj nga raketat dhe dronët rus.
‘Kemi arritur në ditën e 300-të të një sulmi brutal dhe të pajustifikuar që Rusia ka nisur kundër Ukrainës’. Këtë e tha Joe Biden në një konferencë shtypi në Shtëpinë e Bardhë me presidentin ukrainas Volodymyr Zelensky.
"Nuk do të jeni kurrë vetëm", e siguroi ai amerikanin. "Lufta e Ukrainës është pjesë e diçkaje më të madhe. Amerikanët përballen me ngacmuesit dhe luftojnë për liri”, theksoi Biden.
“Ukraina ka thyer pritshmëritë e Rusisë në çdo mënyrë të mundshme”. Joe Biden tha këtë në një konferencë për shtyp në Shtëpinë e Bardhë me presidentin ukrainas Voldymyr Zelensky.
“Shtetet e Bashkuara do t'ju mbështesin për aq kohë sa të jetë e nevojshme”, shtoi presidenti amerikan. “Zelensky i hapur drejt paqes, Putini nuk dëshiron që lufta të përfundojë”, shtoi Biden.
''Ju jeni absolutisht njeriu i vitit''. Presidenti i SHBA Joe Biden ia tha këtë udhëheqësit ukrainas Volodymyr Zelensky të cilin e priti sot në Shtëpinë e Bardhë. Zelensky u kurorëzua si personi i vitit nga revista Time .
“Ju nuk jeni vetëm njeriu i vitit për botën, por veçanërisht për ne amerikanët. Mirë se vini”, tha Biden.
Pas takimit me Biden, Zelensky pritet t'i drejtohet Kongresit Amerikan mbi situatën në Ukrainë dhe veprimet që duhen ndërmarrë kundrejt Rusisë.
Vladimir Putin po përpiqet të përdorë "dimrin si armë" në Ukrainë. Kështu deklaroi Joe Biden kur priti Volodymyr Zelensky në Shtëpinë e Bardhë.
"Populli ukrainas nuk e ka lënë veten të frikësohet. Ne jemi me ju, pranë jush. Ukrainasit me guximin e tyre janë një frymëzim për botën", tha Biden, i cili, duke folur për fundin e konfliktit, shtoi "Shtetet e Bashkuara duan një paqe të drejtë”.
“Lufta nuk ka mbaruar”. Kështu deklaroi presidenti ukrainas Volodymyr Zelensky kur u takua me presidentin amerikan Joe Biden në Zyrën Ovale të Shtëpisë së Bardhë.
Zelensky është takuar me presidentin Joe Biden brenda Shtëpisë së Bardhë në Uashington ku i ka dorëzuar edhe një medalje në shenjë mirënjohje duke e konsideruar si heroin e popullit të Ukrainës. Zelensky falënderoi Biden dhe Kongresin Amerikan për mbështetjen e tyre dhe shprehu mirënjohje edhe për popullin amerikan.
"Faleminderit shumë, zoti President. Natyrisht faleminderit mbështetjen dypartiake, faleminderit Kongresit dhe falënderimet nga njerëzit e thjeshtë për njerëzit tuaj të zakonshëm, amerikanët. Unë e vlerësoj shumë," tha ai.
Zelensky më pas i dha Biden çmimin e heroit, të cilin ai tha se iu dha nga një kapiten në ushtrinë ukrainase që luftonte në rajonin e Donbasit.
Joe Biden dhe gruaja e tij Jill pritën Volodymyr Zelensky në lëndinën jugore të Shtëpisë së Bardhë, para së cilës ishte vendosur tapeti i kuq i rasteve të veçanta. Presidenti ukrainas mbërriti me uniformën e tij të zakonshme ushtarake. Të dy shtrënguan duart dhe u përqafuan përpara se të pozonin për foton zyrtare.
Senati amerikan ka konfirmuar emërimin e Lynne Tracy si ambasadoren e re amerikane në Rusi. Ajo do të jetë gruaja e parë që do të mbajë një pozicion të tillë. Mediat amerikane raportuan se Tracy kishte shërbyer si zëvendësshef i misionit në Moskë nga viti 2014 deri në 2017 dhe aktualisht është ambasadore në Armeni.
SHBA do t’i japë ndihmë ushtarake Ukrainës në vlerë prej 1.85 miliard dollarë. Në këtë paketë të ndihmës përfshihen edhe raketat Patriot. Në paketë përfshihen armë dhe pajisje nga stoqet e Pentagonit, në vlerë prej 1 miliard dollarë, përfshirë edhe raketat Patriot. Po ashtu, 850 milionë të kësaj pakete të ndihmës do të merren nga Nisma për Ndihmë të Sigurisë së Ukrainës.
Ndihma e re po ashtu përfshin financim për sisteme të komunikimit satelitor, që me gjasë do të përfshijë rrjetin e sistemit satelitor të SpaceX Starlink, që është në pronësi të Elon Musk.
“Përderisa Rusia vazhdon sulmet brutale ndaj infrastrukturës kritike të Ukrainës, SHBA-ja mirëpret presidentin Volodymyr Zelensky në Uashington sot, për të dëshmuar përkushtimin tonë të palëkundur për popullin ukrainas”, tha përmes një deklarate sekretari amerikan i Shtetit, Antony Blinken.
Ai tha se SHBA-ja do të ofrojë “kapacitete shtesë ushtarake për të ndihmuar Ukrainën që të mbrojë veten nga sulmi i paprovokuar dhe brutal i Rusisë”.
SHBA është përgatitur për pritjen e presidentit ukrainas Volodymyr Zelensky, i cili ka mbërritur tashmë në Amerikë. Siç shihet edhe në foto, flamuri ukrainas është vendosur në krah të atij të SHBA-së.
Presidenti ukrainas Volodymyr Zelensky ka zbarkuar në Shtetet e Bashkuara, në bazën ushtarake të bazës së përbashkët Andrew, jo shumë larg Uashingtonit.
Presidenti rus Vladimir Putin "duket se nuk është i interesuar për diplomacinë tani". Kështu zëdhënësi i Këshillit të Sigurimit të Shtëpisë së Bardhë, John Kirby, pak orë pas takimit të parë në prani të presidentit amerikan Joe Biden dhe liderit ukrainas Volodymir Zelensky . Prandaj, për momentin, sipas Shteteve të Bashkuara nuk ka asnjë mundësi për t'i dhënë fund konfliktit përmes kanaleve diplomatike.
Presidenti rus Vladimir Putin e quajti konfliktin në Ukrainë një "tragjedi të përbashkët", por fajësoi për shpërthimin e armiqësive Ukrainën dhe aleatët e saj, jo Moskën.
"Ajo që po ndodh është, sigurisht, një tragjedi - tragjedia jonë e përbashkët. Por nuk është rezultat i politikës sonë. Është rezultat i politikës së vendeve të treta," tha udhëheqësi rus gjatë një takimi televiziv me zyrtarë të lartë ushtarakë.
Rusia i konsideron ende ukrainasit një "popull vëlla", tha presidenti rus, Vladimir Putin , i cili, duke folur me ministrin rus të mbrojtjes shtoi se konfrontimi me ‘forcat armiqësore’ në Ukrainë ishte i pashmangshëm.
“Më mirë sot se nesër”, tha Putin.
Putin tha se ai "u përpoq të riparonte marrëdhëniet e Perëndimit me Rusinë", por se "Perëndimi po ndiqte qëllime të ndryshme". Kreu i Kremlinit deklaroi gjithashtu se situata aktuale në Ukrainë është "një tragjedi", por se "nuk është rezultat i" politikës ruse, por "politikës së vendeve të tjera: vendet e treta që kanë luftuar gjithmonë për këtë: deri në shpërbërja e botës ruse.
"Shpresoj se po kaloni një udhëtim të mirë, Volodymyr. Jam i emocionuar që të kam këtu. Shumë për të diskutuar": shkroi Joe Biden në Twitter duke iu përgjigjur Twitterit të Volodymyr Zelensky në fluturimin e tij për në Uashington, në udhëtimin e tij të parë jashtë Ukrainës që nga koha e luftës.
Shtetet e Bashkuara të Amerikës janë përfshirë në ofrimin e sigurisë të Zelenskyt, gjatë udhëtimit të tij të parë jashtë vendit që nga fillimi i pushtimit rus në Ukrainë. Pasi Zelensky pranoi ftesën e Bidenit, dy palët caktuan një takim dhe për pak orë presidenti ukrainas pritet të zbret në Washington.
Zelensky pas takimit me presidentin amerikan Joe Biden në Washington, Zelensky do të vazhdojë vizitën e tij drejt Kongresit amerikan, duke qëndruar atje për një fjalim disa minutësh para ligjvënësve amerikanë.
Disa orë më parë ai është filmuar duke udhëtuar me tren deri në Poloni, nga ku vazhdoi rrugëtimin e tij me aeroplan për në Shtetet e Bashkuara.
Ministri rus i Mbrojtjes ka propozuar rritjen e numrit te përgjithshëm të trupave ushtarake. Ai thotë se është e nevojshme të zgjerohet kufiri i moshës për shërbimin e detyruar ushtarak.
“Ushtria ruse e konsideron të nevojshme të rrisë numrin e saj të ushtarëve në 1.5 milionë”, tha Shoigu.
Sipas ligjit aktual, rusët nga mosha 18 deri në 27 vjeç mund të thirren për shërbimin e detyrueshëm ushtarak, megjithëse Shoigu dhe presidenti Vladimir Putin kanë thënë vazhdimisht se rekrutët e tillë nuk po dërgohen për të luftuar në Ukrainë.
Në fjalimin që mbajti presidenti rus Putin për kombin e tij foli për gatishmërinë ushtarake dhe ndryshimet e reja për vitin 2023, ku tha se së shpejti Rusia do të vendosë raketat balistike ndërkontinentale Sarmat.
Sarmat konsiderohet "flamuri i programeve të reja ushtarake të Rusisë", që do të thotë se këto raketa do jenë kryefjala dhe mjeti më i përdorur i ushtrisë.
Deklarata vjen disa orë pas njoftimit të pritur nga presidenti amerikan Joe Biden për dritën jeshile të Uashingtonit për dërgimin e raketave Patriot në Kiev. Putin siguroi se Moska nuk do të vendosë asnjë kufizim në financimin e Forcave të Armatosura dhe do të vazhdojë të zhvillojë raketa hipersonike
Presidenti Putin mbajti një fjalim drejtuar kombit të tij ku foli për objektivat dhe gatishmërinë e forcave ushtarake ruse si edhe asipiratat për vitin 2023.
“Ne do të rrisim potencialin tonë ushtarak dhe do të vazhdojmë të përmirësojmë gatishmërinë luftarake të forcave tona bërthamore," tha Presidenti rus Vladimir Putin.
Putin gjithashtu përsëriti se Rusia "do të arrijë të gjitha objektivat e saj ushtarake" në Ukrainë, duke nënvizuar " rëndësinë e dronëve" dhe "përvojën ushtarake të fituar në Siri”, e cila sipas tij, duhet të përdoret në planin e vitit 2023.
Një alarm i ri ajror është shpallur në të gjithë Ukrainën ndërkohë që presidenti ukrainas Zelensky pritet të takojë në Uashington presidentin amerikan, Biden, mënyrë kjo e zgjedhur për të reaguar kundër këtij takimi.
Presidenti Putin ka lajmëruar që do mbajë një lajmërim të rëndësishëm në Moskë me liderët e mbrojtjes për të caktuar objektivat dhe strategjitë ushtarake për vitin 2023.
Presidentja e Parlamentit Evropian, Roberta Metsola ka folur në seancën inauguruese të Konferencës së XV të Ambasadorëve të Italisë duke mbështetur Ukrainën dhe duke thënë se Rusia dëshiron t’a shohë Ukrainën e lodhur.
"Vitin e ardhshëm do të duhet të jemi edhe më të fortë me Ukrainën. Ajo do të kthehet përsëri tek ne për mbështetje politike, humanitare, ushtarake, energjetike dhe financiare. Nuk mund të lejojmë të shfaqet lodhja, sepse kjo është ajo që Rusia shpreson: ata duan të shterojnë sistemet dhe durimi e ushtarëve ukrainas. Ne duhet të tregojmë të njëjtën qëndrueshmëri që kërkuam nga ukrainasit”, tha Roberta Metsola.
Kina bën thirrje për dialog dhe marrëveshje midis dy palëve që janë në luftë, Ukrainës dhe Rusisë duke theksuar se synon të ketë rol paqeruajtës.
Presidenti ka folur për çështjen e luftës dhe thotë se ka shpresa që të përfundojë sa më shpejt dhe te vendoset paqja mes dy vendeve pasi pasojat më të mëdha janë mbi popullin, mbi fëmijët e pafajshëm të të dyja vendeve. Kina shpreson që të gjitha palët e përfshira në konfliktin në Ukrainë "të ushtrojnë përmbajtje, të zhvillojnë një dialog gjithëpërfshirës dhe të zgjidhin shqetësimet e përbashkëta të sigurisë përmes mjeteve politike". Në një takim me Dmitri Medvedev, presidenti knez foli për objektivitetin e tij në lidhje me luftën.
“Kina ka vendosur gjithmonë pozicionin dhe politikën e saj bazuar në meritat e vetë çështjes, duke mbrojtur një pozicion objektiv dhe të drejtë dhe promovimin e bisedimeve të paqes”, tha presidenti kinez Xi Jinping
Presidenti ukrainas, Zelenksyy pritet të mbërrijë në Uashington ditën e sotme. Ai do të pritet nga Presidenti i SHBA-ve, Joe Biden rreth orës 14:00 me orën lokale, pra rreth orës 20:00 të mbrëmjes me orën shqiptare.
Presidenti i Ukrainës do të akomodohet fillimisht në ‘South Lawn’, pra në oborrin e pasmë të Shtëpisë së Bardhë, më pas të dy presidentët do të zhvillojnë takimin dypalësh në Zyrën të ashtuquajtur ‘Ovale’, rreth orës 20:30 të mbrëmjes (me orën tonë).
Forcat ukrainase zmbrapsën dje sulmet ruse pranë 25 vendbanimeve në rajonet Kharkiv, Donetsk dhe Lugansk.
Shtabi i Përgjithshëm i Ushtrisë së Ukrainës në raportin e tij të përditshëm për konfliktin me Rusinë tha se ushtria ruse lëshoi dje pesë raketa, 16 sulme ajrore dhe mbi 60 sulme të shumta raketash kundër Ukrainës, duke plagosur civilë në qytetet Kherson, Kostiantynivka dhe Vovchansk. Përveç kësaj, infrastruktura civile u dëmtua rëndë.
Ditën e sotme presidenti rus Vladimir Putin do të vendosë objektivat e ushtrisë së tij për vitin 2023, gjatë një takimi me udhëheqës të lartë ushtarakë. Në takim do të jetë ministri i Mbrojtjes së vendit, Sergei Shoigu, i cili pritet të raportojë për ecurinë e operacionit ushtarak në Ukrainë si dhe rezultatet e aktiviteteve ndërkombëtare të ministrisë.
Kremlini tha në një deklaratë, "Vladimir Putin do të mbajë një takim të zgjeruar të Ministrisë së Mbrojtjes. Rezultatet e aktiviteteve të forcave të armatosura ruse në vitin 2022 do prezantohen si edhe do të përcaktohen detyrat për vitin e ardhshëm”.
Ministri i Mbrojtjes Sergei Shoigu do të marrë pjesë veçanërisht në këtë takim me qëllim të "shfaqjes së progresit të operacionit special ushtarak" në Ukrainë dhe procesit të furnizimit të forcave luftarake me dërgesa armësh. Sipas mediave të huaja, rreth 15,000 zyrtarë të ushtrisë ruse do të marrin pjesë në këtë ngjarje përmes video-takimit.
Ky takim vjen pasi Putini ndryshoi konferencën e tij tradicionale për shtyp në fund të vitit. Rusia, e cila filloi një sulm masiv ndaj Ukrainës në shkurt, ka pësuar pengesa të mëdha ushtarake në muajt e fundit, duke e detyruar atë të tërhiqet nga rajoni i Kharkiv në verilindje të Ukrainës dhe nga qyteti i Kherson në jug.
Presidenti ukrainas Zelensky do i dhuroj presidentit amerikan Joe Biden një flamur të firmosur nga ushtarët ukrainas. Gjatë një vizite ‘surprizë’ të Zelenskyt në Bakhmut, ushtarët i dhanë flamurin presidentit për t’ia dërguar presidentit amerikan në shenjë falënderimi.
“Djemtë më dhanë flamurin tonë të mrekullueshëm me firmat e tyre të shkruara në të për ta dorëzuar”, u tha Zelensky gazetarëve që udhëtonin me të. “Situata jonë është e vështirë. Armiku po rrit numrin e trupave të tij, por djemtë tanë janë më të guximshëm. Ne kemi nevojë për armë më të forta. Ne do t’i përcjellim mirënjohjen nga djemtë tanë Kongresit dhe Presidentit të SHBA për mbështetjen e tyre, por ajo mbështetje nuk mjafton”, tha ai.
Vizita e Zelensky në vijat e frontit në Ukrainën lindore u zhvillua një ditë para se ai të nisej për një vizitë të papritur në Uashington, ku Biden pritet të njoftojë se po dërgon afro 2 miliardë dollarë ndihmë shtesë për sigurinë në Ukrainë, duke përfshirë një sistem të ri të sofistikuar të mbrojtjes ajrore.
Pas takimit të dy presidentët do të mbajnë një konferencë dhe më pas Zelensky do t’u drejtohet anëtarëve të Kongresit në Capitol Hill.
Presidenti i Ukrainës, Zelenskyy pritet të vizitojë sot Uashingtonin. Në një postim në rrjetin e tij social Twitter, Zelenskyy shkruan se është rrugës për të takuar Presidentin e SHBA-ve Joe Biden.
“Rrugës për në Shtetet e bashkuara për të forcuar aftësitë elastike dhe mbrojtëse të Ukrainës”, shkroi Zelenskyy në llogarinë e tij në Twitter.
“Në veçanti @POTUS dhe unë do të diskutojmë bashkëpunimin midis Ukrainës dhe Shteteve të Bashkuara. Do të kem gjithashtu një fjalim në Kongres dhe një sërë takimesh dypalëshe”.- shkroi ndër të tjerash Zelenskyy.
