LEZHË- Pas përfundimit të verifikimeve në qendrën pritëse në Shëngjin, 12 nga 16 emigrantët e mbërritur të mërkurën (16 Tetor) në vendin tonë janë dërguar në kampin e Gjadrit.
Transporti i tyre është bërë me autobus gjatë mesnatës, ndërsa 4 të tjerët, dy prej të cilëve të mitur dhe 2 me probleme shëndetësore janë dërguar në Itali.
Gazetari i Report TV, Elvis Hila, raporton se procedurat po vijojnë nga autoritetet italiane, edhe me ndihmën e atyre shqiptare, që prej ditës së djeshme, kur mbërriti anija ‘Libra’ me 16 refugjatët e parë të kontigjentit, me egjiptianë dhe sirianë.
Kapaciteti për momentin është 400 persona dhe deri tani ka përfunduar 70% e strukturave pritëse dhe akomoduese, përfshi edhe logjistikën e nevojshme.
Konkretisht, rreth orës 08:00 të mëngjesit të djeshëm, anija 'Libra" u ankorua në portin e Shëngjinit me 10 refugjatë nga Bangladeshi dhe 6 egjiptianë.
Të hënën e 14 tetorit 2024, anija ‘Libra’ e Marinës Ushtarake italiane u nis nga Lampeduza drejt Shqipërisë për të sjellë grupin e parë të emigrantëve në kampin e emigrantëve në Gjadër. Ata u shpëtuan në det të dielën e 13 tetorit.
Fillimisht në bord u krye një kontroll fillestar i emigrantëve për të verifikuar nëse ata plotësojnë kërkesat e përcaktuara në protokoll: të jenë me origjinë nga vende të sigurta dhe burra. Gratë, të miturit, personat e torturuar dhe të sëmurët dërgohen në Lampeduza dhe aty presin që kërkesa e tyre për azil të shqyrtohet nga komisionet territoriale.
Kjo marrëveshje është vlerësuar edhe nga ndërkombëtarët, si kryekomisionerja e KE, Ursula von der Leyen, e cila theksoi se marrëveshja Rama-Meloni për emigrantët Itali-Shqipëri, mund të merret shembull edhe nga BE-ja.
Marrëveshja me Italinë për emigrantët u firmos më 6 nëntor 2023 në Romë mes kryeministrit Edi Rama dhe kryeministres italiane Giorgia Meloni dhe ngjalli shumë detabe në të dy anët e Adriatikut, por pavarësisht kundërshtimeve u ratifikua me shumicë votash nga përlamentet e të dy vendeve.
