Kanë mbërritur mbrëmjen e sotme në vend 11.700 doza të vaksinës Pfizer kundër COVID. Lajmi u bë me dije nga Kryeministri Edi Rama, i cili thotë se numri total i vaksinave që kanë ardhur në vendin tonë ka shkuar në 1,079,650.
Kryeministri thekson se vaksinimi do të vijojë pa u ndalur, deri në vaksinimin e qytetarit të fundit.
"Aeroporti “Nënë Tereza” - Kanë mbërritur sërish edhe 11,700 doza të tjera të vaksinës Pfizer, duke e çuar në 1,079,650 sasinë e vaksinave AntiCovid të mbërritura deri tani. Me zgjerimin e fashës së vaksinimit për qytetarët +50 vjeç, vijojmë pa u ndalur me planin kombëtar të vaksinimit dhe nuk do të ndalemi, derisa qytetari i fundit të jetë vaksinuar", shkruan Rama.
Edhe dje në Rinas mbërritën 50 mijë doza të vaksinës Coronavac, ndërsa numri i vaksinimeve të kryera ka shkuar në mbi 890 mijë, me objektivin për të arritur deri në 1 mln vaksinime brenda qershorit.
Ndërkohë, më herët gjatë ditës së sotme, Ministrja e Shëndetësisë, Oegrta Manastirliu bëri me dije se është ulur edhe fasha moshore e vaksinimit dhe do të vijojë për mbi 50-vjeç.
Gjatë ditës së sotme në të gjithë vendin janë kryer 9140 vaksinime, ndërsa nga fillimi i fushatës "Shqipëria Buzëqesh" janë kryer 890.052 vaksinime.
Po sot erdhën edhe mbi 11 mijë vaksina Pfizer që shërbejnë për vijimin e procesit të vaksinimit masiv pa u ndalur në të gjithë vendin. Sigurimi i dozave të vaksinave përmes kontratave të lidhur nga qeveria ka bërë që sot Ministrja e Shëndetësisë, Manastirliu të njoftojë se është ulur edhe fasha moshore e vaksinimit dhe do të vijojë me + 50-vjeçarët.
Komente
