Pas rikthimit të sotëm në protestë të disa grupeve studentësh përpara Ministrisë së Arsimit dhe Kryeministrisë, asambleja e personelit akademik të FSHN-së ka rikonfirmuar këtë të mërkurë mbështetjen e plotë ndaj kërkesave të tyre, duke bërë të ditur se do t’i kërkojë Dekanatit mospenalizimin e studentëve protestues dhe gjetjen e mundësive për zëvendësimin e orëve të parealizuara deri më tani.
Asambleja e personelit akademik të FSHN-së ka kërkuar solidarizimin dhe mbështetjen edhe nga asambletë e tjera universitare në lidhje me VKM-të e dala së fundmi, pasi sipas saj bien ndesh me lirinë akademike dhe autonominë universitare.
Më tej, ajo kërkuar edhe hartimin e një ligji të ri të arsimit të lartë dhe të kërkimit shkencor, sipas standardeve dhe parimeve evropiane, si dhe ka bërë të qartë qëndrimin e saj kundërshtues ndaj fushatës denigruese dhe përbaltëse të figurës së pedagogut dhe institucioneve të Arsimit të Lartë Publik nga ana e kryeministrit të vendit.
Deklarata e Asamblesë së personelit akademik të FSHN-së
Sot një grup studentësh nga Fakulteti i Shkencave të Natyrës dhe i Mjekësisë, pas një periudhe tensioni dhe bojkoti, i janë rikthyer protestave përpara Ministrisë së Arsimit dhe Sportit dhe Kryeministrisë, për të rikërkuar përmbushjen e të gjithë kërkesave të paraqitura prej tyre; për ulje të tarifave studimore, përmirësimin e cilësisë së sistemit arsimor, si edhe anulimin e ligjit të arsimit të lartë. (Lexo këtu)
Komente
