Mjetet ikonike nga Old Cars Club nga Italia tërhoqën vëmendjen e mijëra të pasionuarve pas motorsportit gjatë edicionit të II të Automotive Fair Albania, që u zhvillua 26-29 tetor në Tiranë.
Kryeministri Edi Rama ndau në rrjetet sociale momente nga ky panair me mjete të veçanta e të rralla.
Rama tha se “mjetet ikonike nga Old Cars Club nga Italia garuan për herë të parë në Shqipëri në një cirkuit të dedikuar qytetës duke tërhequr me qindra e mijëra të pasionuar pas motorsportit në zemër të Tiranës si pjesë e Automotive Fair Albania”.
Gjatë këtij panairi publikut ii ofruan minigara, parada dhe shfaqje automotive, ekspozime mjetesh me interes të lartë historik RETRO. Po nuk munguan edhe aktivitetet edukative për të gjitha grupmoshat.
Në ditët e “Automotive Fair Albania”, ngjarja më e madhe për të apasionuarit pas automjeteve, Tirana është shndërruar në një pistë garash me makina, e cila mblodhi bashkë prodhues e koleksionistë të industrisë se automobilizmit.
Garën e makinave e ndoqi dje edhe kryetari i Bashkisë së Tiranës, Erion Veliaj, në sheshin “Nënë Tereza”. Ai tha se “Automotive Fair Albania” i ka sjellë qytetit adrenalinën e garave me makina dhe u shpreh mirënjohës për organizatorët e panairit.
“I keni sjellë Tiranës një shpejtësi të jashtëzakonshme, jo vetëm shpejtësinë e makinave dhe motorëve, por shpejtësinë e ritmit të transformimit dhe të modernizimit. Ndaj, jam shumë mirënjohës për të gjithë ata që kanë qenë mbrapa kuintave, për ata që e kanë kthyer qytetin në një arenë të vërtetë europiane. Jam vërtet krenar për secilin vajzë e djalë, që ka bërë kaq shumë përpjekje, ka dhënë kaq shumë energji, ka hedhur kaq shumë mund e ka duruar kaq shumë kohë për ta kthyer Tiranën në një histori suksesi, dhe për këtë panair të jashtëzakonshëm”, tha Veliaj.
