Një stuhi me intensitet të lartë, që meteorologët shpesh e quajnë “bombë uji”, përmbyti disa nga rrugët e Durrësit mesditën e sotme. Rrebesh i shoqëruar me erë të fortë krijoi vështirësi për lëvizjen e këmbësorëve dhe automjeteve, duke bërë që disa zona të jenë të papërshtatshme për qarkullim.
Zona e plazhit u boshatis nga pushuesit dhe bizneset terhoqën tendat dhe çadrat për të shmangur dëmet për shkak të erërave me intensitet të lartë.
Akset që zakonisht bllokohen si ai i kryqyzimit të stadiumit dhe rruga “Taulantia” pranë shëtitores, u tejmbushën me ujë por tashmë situata duket e normalizuar.
Kryebashkiakja Emiriana Sako bëri apel që qytetarët të shmangin daljet e panevojshme dhe publikoi numrat e kontaktit të shërbimeve emergjente, ku qytetarët mund të telefonojnë për ndihmë ose të raportojnë situata të rrezikshme.
Lajmi kryesor:
Stuhia ‘godet’ vendin, përmbyten rrugë e thyhen pemë! 23 të lënduar në Tiranë, çahet kanali i ujërave të larta në Vlorë, rrezikohen banesat! Vonohen fluturimet në Rinas (VIDEO)
Xh.K/SI.E./ReportTv.al