TIRANË- Në vetëm pak minuta, i gjithë territori i vendit u pushtua në mesditë nga një stuhi e fortë ere, shoqëruar me reshje të dendura shiu. Si pasojë e erës në Tiranë pati dëme që nga rrëzimi i pemëve, te shkatërrimi i objekteve të ndryshme metalike e llamarine, kryesisht në biznese të hapura. Inspektorati Shtetëror i Punës bëri thirrje publike që bizneset në sektorin e ndërtimit të marrin masa për jetën e punëtorëve nga sigurimi i skelave, vinçave, materialet dhe pajisjet në kantiere.
23 persona u paraqitën në spitalin e Traumës me lëndime nga sendet e forta që rrëzoi era. Në disa rrugë u bllokua dhe qarkullimin.
Ndryshimi i papritur i motit solli disa problematika edhe në aeroportin e Rinasit, i cili pezulloi operacionet për rreth 30 minuta. Aktualisht fluturimet po vazhdojnë normalisht. Pati vonesa me 14 fluturime në mbërritje dhe 7 në nisje. 4 fluturime të tjera janë anuluar: Tiranë-Torino, Verona-Tiranë, Pescara-Tiranë, Hamburg-Tiranë.
Edhe qyteti bregdetar i Vlorës u “pushtua” nga një stuhi ere dhe rëre që mbuloi rrugët me pluhur. Shumë pushues u larguan me nxitim, duke krijuar trafik të rënduar në akset hyrëse dhe dalëse. Brenda pak minutash disa rrugë te qytetit u përmbyten nga shiu i furishem.
E njëjta situatë në Lezhë, ku pas mëngjesit me diell, reshjet e rrëmbyeshme ne mesdite përmbytën rrugët kryesore dhe izoluan hyrjet e disa pallateve ku niveli i ujit arriti mbi 30 cm. Trafiku drejt Shëngjinit u paralizua. Disa zona mbetën disa orë pa energji elektrike, pasi u këputën telat përcjellës.
Pas mesditës, Gjiri i Durrësit u përfshi nga stuhi të forta shiu dhe ere, duke sjellë përmbytje të menjëhershme në disa akse kryesore, sidomos në zonat me kanalizime të amortizuara. Në Portin e Durrësit Tragetit të linjës Durrës–Bari “Francesca” iu shkëput një kabllo lidhëse me kalatën, duke krijuar rrezik për përplasje.
Banorët raportuan ndërprerje të përkohshme të energjisë në disa lagje, ndërsa policia rrugore vendosi patrulla shtesë për të menaxhuar trafikun e rënduar.
Reshje të dendura dhe era e fortë, përfshinë qytetin e Fierit, duke shkaktuar rënie pemësh në aksin Fier–Cakran dhe ndërprerje të energjisë elektrike në disa zona të Patosit, Divjakës, Levanit dhe Cakranit.
Në Sarandë, është ndaluar dalja në det e mjeteve turistike dhe peshkarexhave për shkak të erërave të forta. Në plazhe janë ngritur flamujt e kuq si paralajmërim për pushuesit qe te mos futen ne det.
Një traget turistik i Maqedonisë së veriut, i cili ishte duke udhëtuar nga Shën Naumi në drejtim të Ohrit, u kap në befasi nga stuhia e madhe që përfshiu Juglindjen. I detyruar, trageti udhëtoi në pjesën Shqiptare shumë pranë afër bregut.
Shkëputja e kabujve të energjisë elektrike si pasojë e stuhisë së fortë të erës shkaktoi zjarr në shkurret e ferrat e rrethimit të Bazës Ajrore të NATO-s në Kuçovë.
Instituti i Gjeoshkencave njoftoi se reshjet intensive ne disa zona të vendit do të vijojnë edhe të dielën.
Pas një vere të nxehtë e të thatë, Tirana dhe e gjithë Shqipëria u përfshi sot nga një stuhi e fuqishme, që shkaktoi dëme të shumta materiale, por edhe lëndime në njerëz.
Pasojat më të rënda u duk se i pati kryeqyteti, me 23 persona të lënduar, të cilët morën mjekim në Spitalin e Traumës, si dhe me rrugë të bllokuara nga niveli i lartë i ujit, pemët e thyera dhe koshat e mbeturinave të rrëzuar.
Një sportist nga Maqedonia e Veriut që fluturonte me parashutë (paraglajder) ka rrezikuar jetën për shkak të motuit të keq.
Teksa ishte duke kryer fluturim në zonën e Shën Naumit, për shkak të stuhisë së erës ai ka humbur kontrollin dhe ka përfunduar në territorin shqiptar, duke rënë në fshatin Alarup të Pogradecit, por pa rrezik jete.
Komandanti i Shën Naumit ka telefonuar homologët e tij shqiptarë të Policisë Kufitare që pas kontrolleve e gjetën shëndoshë e mirë dhe e kthyen nëpërmjet pikës së Tushemishtit.
“Pas informacionit të marrë nga komandanti i Shën Naumit, të Maqedonisë së Veriut, se një parashutist ishte ngritur në fluturim dhe si pasojë e erës së fortë, kishte devijuar fluturimin dhe mund të kishte rënë në fshatin Alarup, Pogradec, menjëherë shërbimet e Drejtorisë Vendore të Kufirit dhe Migracionit Korçë kanë shkuar në adresën e dhënë, kanë bërë të mundur lokalizimin e tij dhe kanë marrë kontakt me sportistin, shtetasin V. P., i cili ishte në gjendje shumë të mirë shëndetësore. Nga ana e shërbimeve të DVKM Korçë, është bërë e mundur dërgimi i këtij shtetasi në PKK Tushemisht, i cili ka kaluar për në Maqedoninë e Veriut”, bëri me dije policia shqiptare.
Sportisti falënderoi shërbimet e Policisë për reagimin e menjëhershëm dhe profesionalizmin e treguar.
Policia Kufitare konfirmoi se ‘mbetet e angazhuar maksimalisht në shërbim të qytetarëve, vizitorëve dhe turistëve, dhe fton këdo që ndodhet në nevojë të telefonojë në numrin pa pagesë 112’.
Moti i keq ka lënë pasoja në qytetin e Vlorës. Jo vetëm rrugë të përmbytura dhe dëme të shumta materiale nga stuhia e erës dhe shiut, por edhe dëmtime të rrugëve.
Një gropë e madhe është hapur në asfalt pranë tunelit të Ujit të Ftohtë, në vendin e quajtur “Gjurma”, në aksin Vlorë-Radhimë.
Nga pamjet e siguruara nga Report Tv dhe sipas informacionit nga gazetari Armand Xhelili, mësohet se gropa ka përmasa të mëdha, sa për të fundosur edhe mjetet brenda, teksa një prej makinave dallohet se për pak sa nuk ka rënë brenda.
Po kështu në lagjen “10 Korriku” ka prezencë dheu dhe balte, teksa shërbimet e bashkisë janë në terren për të riparuar dëmet e shkaktuara me mjete.
Situatë e pazakontë nga moti i keq në Sarandë. Stuhia e fortë e erës dhe shiut jo vetmë ka shkaktuar përmbytje në rrugë dhe lagje të ndryshme të qytetit bregdetar, por intensiteti i shkarkimeve ka sjellë edhe bllokimin e kanaleve të ujërave të zeza.
Pusetat kanë shpërthyer duke nxjerrë ujërat e zeza në sipërfaqe. Sipas pamjeve që Report Tv ka siguruar, shihet se shirat përmbytin rrugën ‘Jonianët’ në Sarandë, ku nga pusetat kanë shpërthyer ujërat e zeza.
Gjithashtu rrëkeja e ujërave ka vërshuar edhe nga shkallët karakteristike të qytetit, ku disa qytetarë e kanë sfiduar përmbytjen duke përveshur pantallonat dhe zbathur.
Probleme nga moti i keq raportohet se ka pasur edhe në qytetin e Maliqit dhe rrethinat e tij.
Si pasojë e erës së fortë ka pasur rënie të pemëve dhe bllokim të rrugëve në disa segmente të ndryshme.
Punonjësit e zjarrfikëses ndodhen në terren dhe po bëjnë zhbllokimin e rrugëve duke prerë pemët për të liruar qarkullimin e mjeteve.
Një stuhi e shoqëruar me erë të fortë dhe reshje të shumta shiu përfshiu Shkodrën, por fatmirësisht nuk shkaktoi probleme në qytet.
Pamjet nga rrugët kryesore tregojnë një situatë ndryshe nga vetëm një vit më parë, kur çdo shi sillte përmbytje për shkak të mosfunksionimit të kolektorëve.
Falë ndërhyrjeve të kryera nga Bashkia Shkodër dhe ndërmarrja Ujësjellës-Kanalizime, rrjeti i kanalizimeve është përmirësuar ndjeshëm, duke shmangur përmbytjet dhe duke lehtësuar qarkullimin normal në qytet.
Gazetari i Report Tv, Ergys Kavaja, informon se gjatë ditës së sotme, punonjësit e Ujësjellësit kanë qenë në gadishmëri së bashku me strukturat e Bashkisë Shkodër, për të monitoruar situatën dhe për të ndërhyrë në kohë në rast nevoje.
Bashkia Shkodër falënderon punonjësit e Ndërmarrjes së Shërbimeve dhe të Ujësjellës-Kanalizime për angazhimin e tyre, si edhe banorët për mirëkuptimin gjatë punimeve për kolektorët, një proces që vazhdon ende për të garantuar një qytet më të sigurt dhe pa probleme nga përmbytjet.
Një shtyllë e tensionit të ulët është rrëzuar në fshatin Guras të Pogradecit pasditen e sotme.
Mësohet se kjo është një linjë private dhe se nuk evidentohen abonentë pa energji elektrike. Ekipet e OSHEE ndodhen në terren për të monitoruar situatën nga afër.
Saktësojmë që pavarsisht stuhisë së madhe, energjia elektrike vijon të jetë e pandërprerë në të gjithë zonat, përveç zonës së Linit, ku u bë një stakim për rreth 20 minuta për shkak të zjarrit në fshatin Pojskë.
Lezhë- Normalizohet pas 7 orësh situata e trafikut të rënduar rrugor në qarkun e Lezhës.
Qarkullimi i automjeteve pas orës 21:00 ka nisur të normalizohet dhe aktualisht raportohet se nuk ka më radhë kilometrike. E njëjta situatë edhe në Rrugën e Kombit dhe aksin Milot-Rrëshen.
Elvis Hila, gazetari i Report Tv, informon se u arrit që të normalizohej trafiku rrugor, që u rëndua që prej orës 14:00 të pasdites, kur moti i keq detyroi pushuesit e shumtë nga Shëngjini, Velipoja, Talja dhe më gjerë, që të braktisnin plazhet dhe të largoheshin në të njëjtën kohë.
Kjo shkaktoi edhe situatën e rënduar në të gjitha akset kryesore që të lidhnin me Rrugën e Kombit. Segmenti më problematik ishte nga Balldreni, Miloti dhe deri në Rrëshen, ku janë krijuar radhë të gjata kilometrike automjetesh.
Për të menaxhuar situatën, Policia Rrugore u vendos në pika të ndryshme të aksit, me synim lehtësimin e lëvizjes së automjeteve. Rrugët u përballën me kaos, pasi stuhia e shiut që përfshiu zonën detyroi shumë pushues të largoheshin menjëherë nga bregdeti, kryesisht ata kosovarë.
Stuhia e fortë e erës ditën e sotme u bë shkak edhe për shkaktimin e një vatre zjarri në shkurret e ferrat e rrethimit të Bazës Ajrore të NATO-s në Kuçovë.
Zjarri u shkaktua nga shkëputja e kabujve të energjisë elektrike dhe rrezikoi banesat e vilat përreth Aviacionit.
Si pasojë e kësaj, shkëndijat e kabllove kanë rënë në kontakt me barin e shkurret e thata përreth pistës së aviacionit, duke shkaktuar zjarrr. Gazetarja e Report Tv, Mimoza Sinanaj, informon se flakët janë përhapur me shpejtësi të madhe përreth zonës, të favorizuara nga era e fortë, duke rrezikuar edhe banesat e vilat që ndodhen përreth Bazës Ajrore, në fshatin Moravë.
Në vendngjarje, në ndihmë të forcave ushtarake të kësaj baze ajrore, kanë shkuar 20 forca zjarrëfikëse dhe 4 mjete të Repartit tē MZSH-së Berat. Në një kohë të shkurtër, zjarri është vënë nën kontrroll, ndërkohë që për fikjen e plotë të zjarrit ka ndihmuar edhe shiu që ra me furi për pak minuta.
Për shkak të motit të keq që ka pushtuar edhe juglindjen e vëndit, edhe në qytëtin e Pogradecit përgjatë shëtitores disa pemë janë thyer nga stuhia. Fatmirësisht nuk ka pasur dëme ne automjete apo në njerëz.
Një traget turistik i Maqedonisë së Veriut, i cili ishte duke udhëtuar nga Shën Naumi në drejtim të Ohrit, është kapur në befasi nga stuhia e madhe që përfshiu Juglindjen ditën e sotme.
Mësohet se ai në këto kushte, i detyruar, udhëtoi në pjesën shqiptare shumë pranë afëe bregut.
Gazetari i Report Tv, Armand Braho, informon se nuk raportohen dëme dhe të lënduar nga kjo trazirë e kushteve atmosferike. Aktualisht mësohet se mjeti lundrues kaloi në kufirin Maqedonas.
Ndërkohë autoritetet shqiptare doganore bëjne të ditur se njoftimi ka ardhur paraprakisht nga pala maqedonase.
Si pasojë e stuhisë që përfshiu mesditën e sotme (30 gusht) edhe zonën e Fierit, janë rrëzuar edhe pemë në aksin Fier-Cakran, veçanërisht në vendin e quajtur “Qafa e Shkozës”.
Pemët e rrëzuara kanë qënë të djegura më parë nga vatrat e zjarrit, ndërsa kanë bllokuar edhe qarkullimin e automjeteve.
Report Tv ka siguruar pamjet e pemëve të rrëzuara dhe trafikut që ka shkaktuar, në vështirësi të qarkullimit të mjeteve.
Strukturat përkatëse ndodhen në terren për të mundësuar largimin e tyre dhe lirimin e këtij aksi të frekuentuar në çdo orë të ditës, i cili është bllokuar për disa minuta.
Era e fortë dhe reshjet e shiut kanë përfshirë edhe qytetin bregdetar të Sarandës.
Dalja në det e mjeteve turistike dhe peshkarexhave është ndaluar që prej orës 06:00 të mëngjesit.
Ndërkohë para fillimit të stuhisë në plazhe i ngritën flamujtë e kuq për pushuesit.
Një aksident ka ndodhur në aksin Elbasan-Tiranë, pranë fshatit Ibë. Report Tv sjell pamjet, ku dallohen dy mjetet e përplasura, ndërsa nuk pati të lënduar.
Stuhia godet serrat në Roskovec
Stuhia e madhe që përfshiu sot Shqipërinë ka lënë pasoja të ndjeshme edhe në qarkun e Fierit. Sipas raportimeve nga vendngjarja, në fshatin Suk 2 të Roskovecit, serrat me domate kanë pësuar dëmtime serioze, duke shkaktuar shqetësim të madh tek fermerët e zonës.
Fermerët pohojnë se era e fortë dhe reshjet e dendura kanë dëmtuar mbulesat plastike të serrave, duke ekspozuar prodhimin ndaj rrezikut të madh. Gazetarja e Report Tv, Marsela Topi, informon se situata është aq e rëndë, sa shumë prej fermerëve flasin për humbje të konsiderueshme ekonomike.
Gjithashtu nga pamjet e siguruara nga Report Tv shihen sasitë e mëdha të ujit që shkarkohen nga çatitë e serrave dhe stuhia e fuqishme që i godet. Aktualisht, serrat ndodhen në fazën më delikate të prodhimit, ç’ka e bën dëmin edhe më të rëndë për fermerët, të cilët kanë investuar shuma të mëdha për sezonin e këtij viti.
Fermerët kërkojnë mbështetje nga autoritetet lokale dhe qendrore për të përballuar pasojat e stuhisë dhe për të mos lënë punën e tyre të shkojë dëm.
Pamje nga pasojat e stuhisë në Tiranë, 30. gusht 2025
Burime për Report Tv bëjnë me dije se nga era e fortë dhe shiu në Tiranë janë dëmtuar lehtë 20 persona, që kanë kërkuar ndihmë te Spitali i Traumës. 10 prej tyre, pas mjekimit janë larguar nga spitali, ndërsa 10 të tjerët po marrin aktualisht mjekim.
Reshjet e dendura të shiut, që kanë vijuar për më shumë se 60 minuta, kanë përmbytur disa zona të qytetit të Vlorës. Aktualisht disa rrugë janë nën pushtetin e ujit, kryesisht në lagjen "Pavarësia", zonën e Skelës, lagjen "29 Nëntori", si dhe bulevardin"Ismail Qemali".
Kryetari i bashkisë Vlorë, Ermal Dredha, ka bërë me dije se në rreth 15 banesa ka pasur njoftim për përmbytje.
Në terren ndodhen forcat zjarrfikëse dhe ato të bashkisë, të cilat po punojnë për pastrimin dhe hapjen e pusetave e kanaleve kulluese. Ndërkohë, qytetarët janë larguar nga plazhi për shkak të reshjeve të dendura.
Dredha ka bërë sërish thirrje për kujdes, teksa edhe gjatë natës priten sërish reshje intensive në Vlorë. Referuar situatës së ripërsëritur, sipas tij duhet një studim për të ndërhyrë dhe evituar në të ardhmen situata të tilla.
Instituti i Gjeoshkencave bën me dije se sot dhe nesër priten reshje intensive shiu në qarqet Lezhë, Durrës dhe Tiranë. Reshje mesatare deri intensive do të ketë në Shkodër, Dibër, Elbasan, Vlorë dhe Gjirokastër, ndërsa reshje mesatare në Kukës dhe Fier. Në qarqet e tjera priten reshje të dobëta.
Reshjet do të shoqërohen me shtrëngata, të cilat mund të shkaktojnë probleme si vërshime në zona urbane, në varësi të sistemit të kanalizimeve në qarqet Shkodër, Kukës, Dibër, Lezhë, Durrës, Tiranë, Elbasan, Fier dhe Vlorë.
Njoftimi i plotë:
RESHJET
Sot pasdite (e shtunë, dt. 30) dhe nesër (e diel, dt. 31) priten reshje intensive në qarqet Lezhë Durrës dhe Tiranë. Në qarqet Shkodër, Dibër, Elbasan, Vlorë dhe Gjirokastër priten reshje mesatare deri lokalisht intensive. Në qarkun Kukës dhe Fier priten reshje mesatare, ndërsa në qarqet e tjerë priten reshje të dobëta deri lokalisht mesatare (siç tregohet në tabelë, respektivisht për secilin qark).
Reshjet priten të shoqërohen me shtrëngata në të gjitha qarqet.
Shtrëngatat dhe intensiteti i lartë i reshjeve, për momente të shkurtra, mund të krijojnë probleme të ndryshme, si dhe vërshime të ujit në zonat urbane, në varësi të sistemit të kanalizimeve në qarqet Shkodër, Kukës, Dibër, Lezhë, Durrës, Tiranë, Elbasan, Fier dhe Vlorë.
TEMPERATURA
Nesër (e diel, dt. 31) temperaturat minimale dhe maksimale të ajrit pritet të arrijnë:
në bregdet: 19 / 23 °C
në vendet e ulëta: 18 / 26 °C
në vendet malore: 14 / 24 °C
ERA
Sot pasdite (e shtunë, dt. 30) dhe nesër (e diel, dt. 31) era pritet të fryjë e lehtë deri mesatare, për momente të shkurtra deri e fortë në bregdet dhe zonat malore.
ZJARRET NË PYJE
Sot pasdite (e shtunë, dt. 30) pritet rrezik “I ULËT” në qarqet Kukës, Dibër, Elbasan, Korçë dhe Gjirokastër, ndërsa në qarqet e tjerë pritet nivel “S’KA RREZIK”. Nesër (e diel, dt. 31) pritet nivel “S’KA RREZIK” në të gjithë qarqet.
Si pasojë e motit të keq që përfshiu vendin mesditën e sotme tragetit të linjës Durrës-Bari “Francesca”, i akostuar në kalatë, iu shkëput një nga cimet.
Pas këtij incidenti Autoriteti Portual Durrës përmes një postimi në rrjetet sociale bën me dije se situata u menaxhua me profesionalizëm, duke bërë të mundur rilidhjen e cimes.
Njoftimi i plotë:
Gjatë fortunalit të sotëm, tragetit të linjës Durrës–Bari “Francesca”, i akostuar në kalatë, iu shkëput një nga cimet (litari lidhës me kalatën).
Falë ndërhyrjes së menjëhershme të autoriteteve detare, si Kapiteneria e Portit, Autoriteti Portual Durrës dhe Rimorkiatori i ASHD, situata u menaxhua me profesionalizëm dhe siguri, duke bërë të mundur rilidhjen e cimes.
Pas këtij momenti, trageti ka vijuar normalisht lundrimin drejt Barit.
Jemi në gatishmëri të plotë për menaxhimin e situatës.
Reshjet e dendura të shiut, të shoqëruara me erë të fortë, kanë bërë që dy turistë nga Ukraina të mbeten të bllokuar në kodrat e Zvërnecit.
Rreth orës 13:00 të ditës së sotme, për shkak të motit të keq, një pemë ka rënë duke bllokuar rrugën rurale të zonës, ndërsa reshjet kanë dëmtuar edhe segmentin për këmbësor.
Shërbimi zjarrfikës u erdhi në ndihmë turistëve dhe makinave të tjera që ishin aty.
Aeroporti Ndërkombëtar i Tiranës ka bërë me dije se për 30 minuta pezulloi operacionet në pistë për të garantuar sigurinë maksimale të pasagjerëve. Në njoftimin zyrtar, aeroporti thotë se puna aktualisht vijon normalisht, ndërkohë që në Tiranë po ulen edhe avionë me destinacion aeroportet e tjera fqinje.
“Për shkak të motit dhe kushteve të rënduara atmosferike, skuadra e aeoportit ka pezulluar operacionet në pistë për rreth 30 minuta. Kjo është për të garantuar siguri maksimale të pasagjerëve. Ndërkohë puna vijon normalisht. Madje në aeroportin e Tiranës po ulen edhe avionë me destinacion aeroportet e vendeve fqinje.”, thuhet në njoftimin e TIA.
OSHEE bën me dije se ka probleme me energjinë elektrike kryesishst në zonat rurale, ku janë linjat ajrore dhe të shtrira me gjatësi disa dhjetëra kilometra. Zonat më të prekura janë Lushnja, Kuçova dhe Vlora.
Punonjësit janë në terren por nuk mund të ndërhyjnë kur moti është i keq. Nënstacionet dhe linjat 35 KV janë në funksion të plotë, sikurse edhe rrjeti që furnizon hidrovoret.
Policia e Shtetit apelon drejtuesit e automjeteve dhe këmbësorëve që të tregojnë kujdes për shkak të motit të keq. Si pasojë e erës së fortë dhe reshjeve të shiut, ka prezencë uji në disa akse, si dhe inerte e thyerje të pemëve. Për çdo rast nevojë, policia iu kërkon që të telefonojnë në numrin 112.
“Nisur nga moti i keq me erë të fortë, shi e stuhi në disa qarqe të vendit, Policia e Shtetit apelon edhe njëherë për të gjithë përdoruesit e rrugës që të tregojnë kujdes maksimal dhe të respektojnë me rigorozitet rregullat e qarkullimit rrugor. Si pasojë e erës së fortë dhe reshjeve të dendura të shiut, ka prezencë uji në disa akse, inerte dhe thyerje të pemëve.
Drejtuesit e automjeteve dhe motomjeteve të qarkullojnë ngadalë, po ashtu edhe këmbësorët të tregojnë kujdes nga rënia e inerteve, pemëve apo sendeve nga lartësitë e pallateve. Punonjësit e Policisë në të gjitha Drejtoritë Vendore të Policisë janë prezentë kudo në terren, për të ofruar ndihmë dhe mbështetje qytetarëve, për shkak të motit të keq.
Qytetarët dhe përdoruesit e rrugës të bashkëpunojnë me Policinë, në rastet e bllokimit të rrugëve apo problemeve të tjera për shkak të motit të keq, me qëllim koordinimin e veprimeve me gjithë strukturat e tjera shtetërore.
Telefononi në 112 për çdo rast nevoje dhe respektoni udhëzimet e Policisë.”, njofton policia.
I gjithë vendi është përfshirë nga reshje të dendura shiu gjatë ditës së sotme. Përballë kësaj situate, strukturat e emergjencës të Bashkisë së Tiranës, së bashku me grupet e tjera në terren, po punojnë me intensitet për të shmangur problematikat që mund të shkaktohen nga sasia e lartë e ujit.
Megjithë intensitetin e reshjeve, rrjeti i kanalizimeve ka bërë të mundur largimin e ujërave, duke siguruar që qarkullimi i mjeteve dhe lëvizja e qytetarëve të mos pësojnë pengesa.
Siç dëshmohet edhe nga pamjet në terren, punonjësit e Bashkisë janë të pranishëm pranë kryqëzimeve dhe akseve kryesore të Tiranës, duke ndërhyrë për të mbajtur situatën nën kontroll.
Inspektorati Shtetëror i Punës dhe Shërbimeve Shoqërore përmes një njoftimi në rrjetet sociale u bën apel kanterëve të ndërtimit që duhet të marrin masat e nevojshme parandaluese në rastet e motit të keq.
Ata theksojnë se mbrojtja e punonjësve është thelbësore, dhe në kushtet e një stuhie puna duhet të ndërpritet.
Njoftimi i plotë
Të gjithë subjektet që operojnë në sektorin e ndërtimit të marrin masat e nevojshme parandaluese në rast të parashikimit të një stuhie ose moti të keq.
Siguroni skelat, vinçat, materialet dhe pajisjet në kantier.
Hiqni dhe vendosni në vend të sigurt elementët e lirë që mund të shkaktojnë rrezik.
Siguroni mbrojtjen e punëmarrësve duke ndërprerë punimet në kushte të rrezikshme.
Vendosni shenjat paralajmëruese për sigurinë e të tretëve.
Të garantojmë sigurinë e punëmarrësve dhe qytetarëve si dhe të parandalojmë aksidente që mund të ndodhin nga kushtet e papërshtatshme atmosferike.
Moti i keq ka “prekur” edhe fluturimet për në Aeroportin Nënë Tereza në Tiranë.
Në faqen zyrtare të Aeroportit bëhet me dije se të paktën 9 fluturime mbërritjeje janë vonuar. Bëhet fjalë për mbërritjet e avionëve nga Perugia, Romë, Milano, Trieste, Viena, Parisi, Varshava, Kopenhagen, Frankfurt, Zyrih etj.
Ndërkohë janë anuluar dy fluturime nga Tirana për në Pescara dhe Hamburg. Gjithashtu 10 fluturime nga Tirana janë vonuar.
Një stuhi me intensitet të lartë, që meteorologët shpesh e quajnë “bombë uji”, përmbyti disa nga rrugët e Durrësit mesditën e sotme. Rrebesh i shoqëruar me erë të fortë krijoi vështirësi për lëvizjen e këmbësorëve dhe automjeteve, duke bërë që disa zona të jenë të papërshtatshme për qarkullim.
Zona e plazhit u boshatis nga pushuesit dhe bizneset terhoqën tendat dhe çadrat për të shmangur dëmet për shkak të erërave me intensitet të lartë.
Akset që zakonisht bllokohen si ai i kryqyzimit të stadiumit dhe rruga “Taulantia” pranë shëtitores, u tejmbushën me ujë por tashmë situata duket e normalizuar.
Kryebashkiakja Emiriana Sako bëri apel që qytetarët të shmangin daljet e panevojshme dhe publikoi numrat e kontaktit të shërbimeve emergjente, ku qytetarët mund të telefonojnë për ndihmë ose të raportojnë situata të rrezikshme.
Stuhia ka përfshirë të gjithë vendin. Në rrjetet sociale po qarkullojnë këto pamje nga Malësia e Tiranës, e cila është ‘pushtuar’ nga mjegulla.
Reshjet e shiut dhe mjegulla e dendur kanë pushtuar edhe kryeqytetin. Reshjet e shiut dhe era e fortë kanë rrëzuar disa pemë te ish-stacioni i Trenit, Shkolla e Bashkuar apo te zona e Oxhakut, duke bllokuar dhe qarkullimin.
Ndërkohë, siç shihet edhe nga videot, era e fortë ka ‘ngritur’ në ajër edhe mbeturina të shumta.
Edhe qyteti i Fierit është përfshirë nga reshje të dendura shiu mesditën e sotme.
Siç shihet nga pamjet e siguruara nga Report Tv për shkak të stuhisë dhe reshjeve në rrugë të qyetit është krijuar edhe trafik.
Në disa zona energjia elektrike është ndërprerë, ndërsa në aksin rrugor Fier-Cakran disa pemë janë rrëzuar..
Mëngjesi me diell i së shtunës në Lezhë u pasua nga reshje të rrëmbyeshme shiu, të cilat nisën rreth mesditës dhe vazhduan me intensitet për rreth 45 minuta. Trafiku u bllokua, veçanërisht për automjetet që lëviznin drejt e nga Shëngjini, ndërsa rrugët kryesore u përmbytën nga vërshimi i ujërave.
Në qytet, disa hyrje pallatesh u izoluan pasi niveli i ujit arriti mbi 30 cm, duke e bërë pothuajse të pamundur lëvizjen e banorëve, ndërsa pas orës 13:00, intensiteti i reshjeve u ul, duke sjellë një normalizim të pjesshëm të situatës.
Situata e rënduar nga moti i keq ka sjellë edhe ndërprerje të furnizimit me energji elektrike, ku probleme janë raportuar edhe në zonën turistike të Shëngjinit. Autoritetet lokale po ndjekin nga afër zhvillimin e situatës për të marrë masat e nevojshme.
Ndërkohë Bashkia Lezhë ngriti një grup pune në gjendje gatishmërie dhe u bëri apel banorëve që të shmangin lëvizjet deri në përmirësimin e kushteve atmosferike dhe tejkalimin e situatës problematike. Situata e rënduar nga moti i keq ka sjellë edhe ndërprerje të furnizimit me energji elektrike, ku probleme janë raportuar edhe në zonën turistike të Shëngjinit. Autoritetet lokale po ndjekin nga afër zhvillimin e situatës për të marrë masat e nevojshme.
Vlora është përfshirë gjatë ditës së sotme nga erëra shumë të forta që kanë sjellë një stuhi rëre, duke mbuluar qytetin bregdetar. Pamjet tregojnë rrugë të mbushura me pluhur dhe dukshmëri të ulët, ndërsa era e fortë ka krijuar vështirësi për qytetarët.
Situata është shoqëruar edhe me trafik të rënduar, pasi shumë pushues kanë zgjedhur të largohen me shpejtësi nga qyteti, duke bllokuar akset hyrëse dhe dalëse të Vlorës.
Autoritetet u bëjnë apel drejtuesve të mjeteve që të tregojnë kujdes të shtuar në qarkullim, ndërsa qytetarët këshillohen të shmangin lëvizjet e panevojshme deri në përmirësimin e kushteve atmosferike.
Komente
Me siguri do te kete nje analize nga organet kompetente per situaten dhe do te arrijne ne perfundimin se fajin e ka ngrohja globale. Rrjeti i kanalizimeve eshte bashkohor,ndertimet jane te systemuara aq sa ma mire nuk behet. Una kisha vetem nje pyetje si ka mundesi qe permbytet pjesa e qytetit mbi niveli e detit dhe jo ish-keneta?
PërgjigjuIdiot!
S eshte stuhi rere por pluhur i ndrttimeve pa kriter dhe mos pastrimit Tiranes prej mujash. Tr pakten shiu e ben detyren, lan rruget e baltosura!
Përgjigju